Украиналик блогер Roma Urraco ўзининг YouTube’даги каналига навбатдаги ноодатий топилма — иккинчи ва учинчи авлод «ГАЗ-21» автомобиллари намойиш этилган видеони жойлаштирди. Иккала ноёб автомобиль ҳам ажойиб ҳолатда сақланган. Шу билан бирга, ролик муаллифининг сўзларига кўра, транспорт воситалари ҳеч қачон реставрация қилинмаган, бу эса «вақт капсулалари»нинг қийматини янада оширади, деб ёзади Motor.
Намойиш этилган машиналарнинг биринчиси 1960 йилги иккинчи авлод «Волга»си ҳисобланади. Автомобиль кузови камёб, ишлаб чиқарувчи номенклатурасида «қаҳвали» деб аталувчи рангга бўялган. «ГАЗ-21» СССРда яшаган ва асосан мамлакатнинг шимолий ҳудудларида ишлаган фуқарога тегишли бўлган. Шу сабабли машина эгаси ўз автомобилидан жуда кам ҳолларда фойдаланган — ҳозирга қадар 43 118 километр йўл босган. Бундан ўн йиллар олдин ноёб «Волга» Донецк вилоятидан топилган ва ўшандан буён у хусусий коллекцияда сақланмоқда.
Иккинчи «вақт капсуласи» 1967 йилда конвеердан чиққан «ГАЗ-21» модели ҳисобланади. Мазкур модификациянинг ўзига хослиги «кит мўйлови» услубида яратилган радиатор панжараси, шунингдек, капотида буғу фигурасининг йўқлигида. Ушбу «Волга»нинг тарихи янада қизиқ. Машина ўтган асрнинг ўрталарида запорожелик аёлга уйланган Италия фуқаросига тегишли бўлган. Фарзандлари дунёга келгач, эркак иккита бир хил «Волга» сотиб олган.
Орадан йиллар ўтгач, Апеннин яримороли фуқароси Собиқ иттифоқни тарк этиб, иккала «ГАЗ-21»ни ҳам рафиқасига ташлаб кетган. Автомобилларнинг биридан деярли ҳар куни фойдаланилган, иккинчи «Волга» эса гаражда сақланган. 16,4 минг километр йўл босган транспорт воситаси ҳозирда ўз харидорини топган.
Аввалроқ Россияда оддий «Волга» энг қиммат Toyota Land Cruiser 300 нархида сотувга қўйилгани тўғрисида хабар берилганди.
Изоҳ (0)