Бош прокуратура ҳузуридаги департаментнинг Сирдарё вилоят бошқармаси томонидан ўтказилган тезкор тадбирда фуқарони ўқишга киритиб қўйиш эвазига 4,5 минг доллар олган шахс ушланди.
Маълум қилинишича, Х.Ж. исмли шахс бошқа бир фуқарони Ўзбекистон Давлат жисмоний тарбия университетига юқори лавозимда ишловчи таниши орқали ўқишга киритиб қўйиш эвазига 4,5 минг долларни фирибгарлик йўли билан олган вақтида ашёвий далиллар билан қўлга олинган.
Шунингдек, департамент ва ДХХнинг Тошкент вилоят бошқармалари ходимлари томонидан ўтказилган тезкор тадбирда фуқаро Ф.Ё. бошқа бир фуқарони ўзининг ваколатли ташкилотларда ишловчи танишлари орқали Қозоғистондаги олий таълим муассасасига ўқишга киритиб қўйишни ваъда қилгани аниқланган. Шунингдек, у Қозоғистондаги ўқишни 2-курсдан Ўзбекистондаги олийгоҳга кўчириб бериши эвазига фуқаро Ш.Х.дан фирибгарлик йўли билан 5,8 минг долларини олган вақтида ашёвий далиллар билан ушланган.
Бундан ташқари, департамент ва ДХХнинг Фарғона вилоят бошқармалари томонидан тезкор тадбир ўтказилган. Тадбирда Фарғона Давлат университетининг Х.М. ва Ш.Т. исмли талабалари олдиндан тил бириктириб, юқори лавозимда ишловчи танишлари орқали фуқаро М.Б.ни ўқишини хориж университетидан Фарғона Давлат университетига кўчириб беришни ваъда қилгани аниқланган. Шунингдек, улар яна икки нафар фуқарони Фарғона Давлат университетининг сиртқи бўлимига ўқишга киритиб қўйиш эвазига 10 минг долларни олган вақтида қўлга олинган.
Тезкор тадбир давом эттирилиб, Фарғона шаҳридаги «С» ўқув маркази ўқитувчиси Э.А. фуқаро М.Б.ни ўқишини хориж университетидан кўчириб бериш ҳамда икки нафар фуқарони ўқишга киритиб қўйишни ваъда қилиб, эвазига талаб қилган 8 минг АҚШ долларини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкентда фуқаронинг хориждаги ўқишини «ТошМИ»га кўчириб бериш эвазига 6 минг доллар олган шахс ушлангани, Навоий давлат педагогика институтига ўқишга киритиб қўйишни ваъда қилиб, фуқародан 2 минг доллар олган шахс қўлга олингани, Жиззахда 18 минг доллар эвазига икки фуқарони хориж университетига ўқишга киритиб қўйишни ваъда қилган шахслар ушлангани тўғрисида хабар берилганди.
Изоҳ (0)