Гулнора Раҳимова молия вазирининг ўринбосари этиб тайинланди. Вазирлик матбуот хизматининг маълум қилишича, бу ҳақда 12 июль куни Президентнинг тегишли қарори имзоланди.
Гулнора Раҳимова 1975 йил Тошкент шаҳрида туғилган. 1996 йилда Тошкент давлат иқтисодиёт университетини тугатган. Меҳнат фаолиятини Миллий университет ўқув бўлими мутахассиси, Иқтисодиёт факультети менежмент кафедраси катта ўқитувчиси сифатида бошлаган (1995—2002). Миллий университетда катта илмий ходим (2011—2014), Молия вазирлиги ҳузуридаги бюджет ташкилотлари ва молия органлари ходимларини тайёрлаш ва қайта тайёрлаш бўйича ўқув марказининг Давлат бюджетининг Ғазначилик ижроси кафедрасида катта ўқитувчи бўлиб ишлаган (2014—2017). Кейинроқ ушбу бўлим бошлиғи сифатида фаолият олиб борган (2017—2019).
Шунингдек, у Молия вазирлиги Ғазначилигининг Давлат харидлари ва мониторинги дирекциясининг раҳбари (2019), сўнгра Молия вазирлиги Ғазначилигининг Давлат харидлари департаменти директори сифатида ишлаган (2019—2020).
Тайинловга қадар у 2020 йил 2 октябрдан бошлаб Молия вазирлиги Ғазначилик бошқармаси бошлиғининг ўринбосари — Давлат харидлари департаменти директори лавозимида ишлаб келаётганди.
Молия вазирлигининг «Gazeta.uz»га маълум қилишича, Гулнора Раҳимова 2021 йилнинг апрель ойида кучга кирган «Давлат харидлари тўғрисида»ги қонуннинг муаллифи ҳисобланади.
Эслатиб ўтамиз, 2019 йилнинг 7 мартида молия вазири маслаҳатчиси Одилбек Исоқов молия вазири ўринбосари этиб, 2020 йилнинг 9 июлида эса Молия вазирлиги Давлат бюджети бош бошқармаси бошлиғи лавозимида ишлаб келган Жамшид Абруев молия вазири ўринбосари этиб тайинланганди.
Изоҳ (0)