Адлия вазири Русланбек Давлетов АОКАда ўтказилган матбуот анжуманида 2021 йилнинг 6 июль куни имзоланган «Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида»ги Президент қарори ҳақида гапираркан, қарор лойиҳаси муҳокамаси пайтида мавжуд бўлган «тадбиркорлик билан шуғулланиши қатъиян тақиқланадиган давлат мансабдорлари рўйхатини белгилаш ҳақидаги» банд нима сабабдан чиқариб юборилганига оид саволга изоҳ берди. Бу ҳақда «Дарё» мухбири хабар қилмоқда.
«Муҳокамага қўйилган бандда Адлия вазирлиги Бош прокуратура ҳамда бошқа манфаатдор вазирлик ва идоралар билан биргаликда 2021 йил 1 октябрга қадар тадбиркорлик фаолияти билан шуғулланиши қатъиян тақиқланган давлат органларининг мансабдор шахслари ва ходимларининг рўйхатини белгилаш бўйича таклифларни киритиш юзасидан топшириқ ёзилган эди.
Худди шу банд турибди, фақат ‘аниқ рўйхати’ дейилмасдан, ўрнига ‘давлат хизматчилари томонидан тадбиркорлик фаолиятида иштирок этганлигининг ҳуқуқий оқибатларини белгилашни назарда тутувчи қонун лойиҳаси’га алмаштирилди. Яъни бу масала очиқ қоляпти, деган маъно келиб чиқмаяпти», — деди Давлетов.
Унинг таъкидлашича, амалдорларга тадбиркорлик қилиш бугунги қонунчиликда тақиқланган.
«Давлат хизматчиларига бугунги кунда тадбиркорлик фаолияти билан шуғулланиш тақиқланганлиги амалдаги қонунда турибди. Биринчидан, 2016 йилда ҳукумат томонидан тасдиқланган ‘Давлат бошқаруви органлари ва маҳаллий ижро этувчи ҳокимият органлари ходимларининг одоб-ахлоқ намунавий қоидалари’ ҳужжатида амалдорларнинг тадбиркорлик билан шуғулланишига тақиқ қўйилган. Иккинчидан, ҳукуматнинг 1992 йилдаги 103-сонли қарорига асосан, тадбиркорлик фаолияти билан шуғулланиши тақиқланган мансабдор шахсларнинг рўйхати тасдиқланган», — деди адлия вазири.
Унинг қайд этишича, амалдаги қонунчиликка кўра, давлат хизматчилари якка тартибда тадбиркорлик қила олмайди, холос, аммо МЧЖ таъсисчиси бўлишга ҳақли.
«Тадбиркорлик фаолияти дегани, нима дегани? Агар ‘Тадбиркорлик фаолияти кафолатлари тўғрисида’ги қонунга қарайдиган бўлсак, тадбиркорлик бу таваккалчилик эвазига ўзининг фаолиятидан келиб чиқиб, тизимли равишда даромад олишга мўлжалланган фаолият тури ҳисобланади.
Амалдор тадбиркорлик фаолияти билан шуғуллансин деганда, бугунги кундаги қонунчилик бўйича фақат тушуниладики, якка тартибдаги тадбиркор бўлиши мумкин эмас, деган маъно чиқади.
Лекин агар масъулияти чекланган жамият таъсисчиси бўлса, бугунги кундаги қонунчилик бўйича, бу тадбиркорлик фаолияти ҳисобланмайди. Ва бу тартиб бизга тўғри келмайди, биз буни қайта кўриб чиқиб, мана шу таклифларни беряпмиз.
Давлат хизматчилари МЧЖ таъсисчиси бўлолмайди, деган норма мана яқинда Россияда ҳам киритилди, бошқа давлатларда ҳам бор», — деди Русланбек Давлетов.
Давлетов манфаатлар тўқнашуви билан тадбиркорликни аралаштирмаслик кераклигини айтди.
«Қурилиш вазирлиги ҳамда Жиззахда бўлган ҳолатлар тадбиркорлик фаолияти билан шуғулланиш эмас. Бу манфаатлар тўқнашуви, деган масала. Манфаатлар тўқнашуви билан тадбиркорликни аралаштирмаслик керак.
Манфаатлар тўқнашувига мансабдор шахснинг қариндошларига тегишли компаниялар ёки унинг объектив қарор қабул қилишига таъсир кўрсатувчи омиллар киради. Мансабдор шахс бу ҳолатда қарор қабул қилишдан четлатилиши лозим.
Мана шу ҳолатлар бўйича алоҳида қонун ишлаб чиқиш белгиланган. Буни Адлия вазирлиги ишлаб чиқиб, охирига етказяпти», — деди у.
Изоҳ (0)