Наманганда танишининг юзига куйдирувчи суюқлик сепиб, унинг тилла тақинчоқлари ва телефонини олиб қочган йигит қўлга олинди. Бу ҳақда вилояти ИИБ ахборот хизмати хабар берди.
Маълум қилинишича, 9 июль куни соат 23:22 да вилоят ИИБ 102-тизими операторига мурожаат келиб тушган. Унда айтилишича, Давлатобод туманида яшовчи 1980 йилда туғилган аёл шу куни соат 22:30 ларда хусусий шифохонада навбатчилик қилиб турганида Муроджон исмли таниши у билан кўришиб, гаплашиб олиш мақсадида келган.
Аёл уни ихтиёрий равишда хусусий шифохонага олиб кириб, ўзаро гаплашиб ўтирган вақтида йигит унинг бўйнидан бўғган ва пул ёки бошқа моддий қимматликдаги буюмларни беришни талаб қилган. Аёлнинг юз қисмига полиэтилен идишда бўлган суюқликни сепиб, бўйнидаги нархи 3 миллион сўмлик занжир, қулоғидаги нархи 4,5 миллион сўмлик тилла зирак ҳамда нархи 4,5 миллион сўм турувчи Huawei телефонини босқинчилик йўли билан олиб, ҳодиса жойидан номаълум томонга яширинган.
РШТЁИМ Наманган филиалининг дастлабки маълумотномасида аёлнинг чап кўзи, оғиз-лаби ва юз териси куйгани кўрсатилган.
ИИВ ЖҚББ ходимлари, вилоят ИИБ ЖҚБ, ва Наманган шаҳар ИИО ФМБ ЖҚБ ходимлари томонидан олиб борилган тезкор-қидирув ва суриштирув ҳаракатлари натижасида ушбу жиноятни Андижон вилояти Балиқчи туманида яшовчи 23 ёшли Н.Муроджон содир этгани аниқланган.
Ушбу ҳолат бўйича Наманган шаҳар ИИО ФМБ ҳузуридаги Тергов бўлими томонидан 2021 йил 10 июль куни Жиноят кодексининг 164-моддаси (босқинчилик) 1-қисми билан жиноят иши қўзғатилиб, гумонланувчи Жиноят процессуал кодексининг 221-моддаси тартибида ушланган.
Аввалроқ Бухорода босқинчилик йўли билан ногирон фуқаронинг мол-мулкини талон-торож қилган ёшларга суд ҳукми ўқилган, Тошкентга кетаётган такси ҳайдовчисига тош билан ҳужум қилиб, ёнидаги 4800 долларни олиб қочган шахс қўлга олинган эди.
Изоҳ (0)