Энг қўпол ўйинчи ким, гол уриш бўйича қайси клуб ва лигалар етакчи, голлар қай вақтда кўпроқ урилди? Евро—2020 нинг барча рақамлари битта саҳифада (фото)

Бир ой давом этган Евро—2020 ҳам ўз ниҳоясига етди. Ушбу мусобақа турли шаҳарларда ўтказилгани билан ҳам ёдда қолди. «Уэмбли»да ўтказилган финалда Италия пенальтилар сериясида Англияни мағлубиятга учратди ва Евро—2020 ғолиблигини қўлга киритди. «Дарё» қуйида Европа чемпионатига оид энг қизиқарли статистикаларини тақдим этади.

Футболчилар

Криштиану Роналду 5 та гол билан мусобақа тўпурарига айланди. Чехия футболчиси Патрик Шик ҳам 5 та гол урди. Лекин Роналду 1 та голли узатмани ҳам амалга оширгани учун тўпурарлик соврини унга топширилди.

Голли узатмалар бўйича Швейцария терма жамоаси футболчиси Зубер биринчи ўринда турибди. Футболчи жамоадошларига 4 та голли узатмани амалга оширди.

Қуруқ ўйинлар сони бўйича (дарвозабонлар орасида) Жордан Пикфорд энг яхши натижани қайд этди. Англия посбони 5 та ўйинда дарвозаси дахлсизлигини сақлаб қолди. Яна бир финалчи Жанлуижи Доннарумма эса 3 та ўйинда гол ўтказиб юбормади.

Швейцария посбони Ян Зоммер энг кўп сейв (21) амалга оширди. Каспер Шмейхель (Дания), Улгуржан Чақир (Туркия) ва Дэнни Уорд (Уэльс) 18 та сейв билан кейинги ўринларни эгаллаб турибди.

Муваффақиятли дриблинг борасида Раҳим Стерлингга тенг келадигани бўлмади — 22 та.

Мусобақанинг энг қўпол футболчиси Томас Дилэйни бўлди. Даниялик футболчи рақибларга нисбатан 15 та қўполлик ишлатди. Иккинчи ўринни италиялик Жованни ди Лоренцо (13) эгаллади. Учинчи ўринда эса Келвин Филлипс (12) турибди.

Жоржиньо Евро—2020 да энг кўп масофани босиб ўтди — 86,61 км. Кучли бешликда Англиянинг уч нафар ва ярим финалда ўз юришини тўхтатган испаниялик иқтидор Педри жой олди.

Голлар

Евро—2020 да 51 та ўйин ўтказилди ва 142 та гол урилди. Ҳар бир ўйинга ўртача 2,79 та гол тўғри келади. Ҳар икки кўрсаткич бўйича Европа чемпионати рекорди ўрнатилди.

Голлар қандай урилган:

• 61: ўнг оёқ
• 43: чап оёқ
• 27: бош билан
• 11: автогол

Қандай ва қаердан урилди:

• Жарима майдони ичидан: 123
• Жарима майдони ташқарисидан: 19
• Ўйиндан: 132
• Пенальтидан: 9
• Жарима зарбасидан: 1

Евро—2020 да энг кўп гол (30 та) 46—60-дақиқалар оралиғида урилди. Энг кам гол эса 2-қўшимча бўлимда урилган. Жамоалар қўшимча бўлимда 2 та гол урди.

Эмиль Форсберг 82-сонияда Польша дарвозасини ишғол қилиб мусобақадаги энг тезкор голни урди. Юссуф Поульсен эса 99-сонияда Бельгия дарвозасига гол урди. Учинчи ўринда эса Люк Шоу турибди. Англиялик ҳимоячи финалда Италия дарвозасини 116-сонияда ишғол қилди.

Евро финалларидаги энг тезкор гол урилди. Англия футболчиси Люк Шоу 2-дақиқада (1:57) Италия дарвозасини ишғол қилди. Бу Евро финалларидаги энг тезкор гол.

Шимолий Македония футболчиси Горан Пандев Евро—2020 да гол урган энг ёши катта футболчига айланди. Пандев 37 ёш 321 кунлик вақтида Австрия дарвозасига гол урди.

Евро финалларида гол урган энг ёши катта футболчи — Леонардо Бонуччи (34 ёш-у 71 кунлик).

Жамоалар

Италия ва Испания Евро—2020 да энг кўп гол урган терма жамоалар бўлди. 13 та гол уриш учун Италия 7 та ўйин сарфлаган бўлса, Испания бу натижага эришиши учун 6 та ўйин кифоя қилди.

«Ювентус» футболчилари мусобақада энг кўп гол урди. Уларнинг ҳисобида 12 та гол мавжуд. Туринликлар таркибидан Криштиану Роналду (5), Альваро Мората (3), Федерико Кьеза (2), Аарон Рэмзи (1) ва Леонардо Бонуччи (1) гол муаллифига айланди.

А Серия вакиллари мусобақада энг кўп гол урди. Италия чемпионатидан ташриф буюрган футболчилар ҳисобида 36 та гол мавжуд.

Энг кўп ўйин бошқарган ҳакам Феликс Брих (5) бўлиб турибди. Иккинчи ўринда Бёрн Куйперс (4) ва Данни Маккели (4) турибди.

Стадионлар

Энг кўп дуранг натижа «Уэмбли» стадионида қайд этилди. D гуруҳидан ўрин олган Англия ва Шотландия ўртасидаги 2-тур ўйини нурсиз дуранг билан якунланди. Ярим финалда Италия ва Испания ўртасидаги баҳсда 1:1 ҳисобида қайд этилди ва жамоалар пенальтилар сериясигача борди. Итальянлар Луис Энрике шогирдларини мусобақадан чиқариб юборди. Финалда эса номинал мезон сифатида иштирок этган Италия ҳақиқий мезбон Англияга қарши баҳс олиб борди. Асосий вақтлар 1:1 ҳисобида якунланган бўлса, пенальтилар сериясида Роберто Манчини шогирдлари рақибидан устун келди ва Евро—2020 ғолибига айланди.

Энг кўп ўйинлар ўтказилган стадион ҳам «Уэмбли» бўлди. Евро—2020 нинг 8 та ўйинини Лондондаги стадионда бўлиб ўтди. «Санкт-Петербург» стадионида 7 та ўйин ўтказилди. Қолган барча стадионларда 4 тадан ўйинлар бўлиб ўтди.

Будапештдаги «Пушкаш Арена» стадионининг 82 фоизи тўлди. Копенгагенда жойлашган «Паркен» стадиони эса 55% қисмини мухлислар билан тўлдира олди. Учинчи ўринни эса 43% билан «Уэмбли» стадиони олди.