2021-yilga ko‘chirilgan Yevro—2020 musobaqasi boshlanishiga 1 kun vaqt qoldi. Musobaqa 11-iyun, juma kuni Turkiya—Italiya uchrashuvi bilan ochib beriladi. “Daryo” quyida Yevropa chempionati bahslariga mezbonlik qiladigan stadionlar haqida batafsil ma’lumot beradi.

“Uembli”, London

“Uembli” — musobaqaning asosiy stadioni. Bu yerda final va yarim finaldan tashqari yana 8 ta o‘yin bo‘lib o‘tadi. Buyuk Britaniya hukumati may oyining o‘rtalarida stadionga 10 ming muxlis kirishi mumkinligini aytgan edi, may oyining oxirida esa Angliya Kubogi finalida “Uembli”ga 20 ming muxlis tashrif buyurdi.

Angliya futbol federatsiyasi UEFAga guruh bosqichi o‘yinlariga stadion sig‘imining chorak qismiga muxlislar kirishiga ruxsat berilishini, hal qiluvchi o‘yinlarda esa 50% muxlisga ruxsat berilishini xabar qildi.

Foto: “Daryo” / Husan Sobitov

“Hempden Park”, Glazgo

Koronavirus pandemiyasi xavfiga qaramasdan 7-aprel kuni Shotlandiya rasmiylari “Hempden Park”ka kirishga 12 ming muxlisga ruxsat berilishini e’lon qildi. Bu stadionning 25% qismi to‘ladi degani. Shubhalarga o‘rin qolmadi — o‘yinlar Angliyaga ko‘chirilmaydi (favqulodda vaziyatlar yuz bermasa).

Foto: “Daryo” / Husan Sobitov

“Yohan Kroyff Arena”, Amsterdam

Niderlandiya futboli rasmiylari 13 ming muxlis Yevro o‘yinlarini Amsterdam stadionidan kuzatish imkoniga ega bo‘lishini tasdiqladi. Bu qaror yana ko‘rib chiqilyapti va yakunda bu ko‘tsatkich yana 5 mingga oshishi mumkin.

Foto: “Daryo” / Husan Sobitov

“Milliy stadion”, Buxarest

Ruminiyaliklar Yevro—2020 o‘yinlariga 13 ming muxlisni kirishiga ruxsat berdi. Bu stadionning chorak qismi. Ushbu stadonda tajriba maqsadida o‘yinlar o‘tkazildi. Bahorda “Chelsi” va “Atletiko”ning Chempionlar Ligasi pley-off o‘yinlari shu stadionda bo‘lib o‘tdi.

“Biz yirik sport musobaqasining bir qismiga aylanib, tashkilotchilik va xavfsizlik borasida talablarga javob bera olishimizni butun dunyoga ko‘rsatib qo‘ymoqchimiz”, — dedi Ruminiya sport vaziri Eduard Novak.

Foto: “Daryo” / Husan Sobitov

“Parken”, Kopengagen

Mart oyining oxirida Daniya hukumati Yevro—2020 musobaqasiga stadionning 30% qismi to‘lishiga ruxsat berishini ma’lum qildi. UEFAning rasmiy xabariga ko‘ra, stadionning 25-33% qismiga muxlislar kirishi tasdiqlangan.

Daniya madaniyat vaziri: “Agar imkoni bo‘lsa, biz ko‘proq muxlisni stadionga kiritamiz. Agarda virus epidemiyasining yangi to‘lqini boshlansa, biz o‘yinlarni muxlislarsiz o‘tkazishga majburmiz. Bunday vaziyatda muxlislarni stadionga kiritish mumkin emas”, — deb aytib o‘tdi.

Foto: “Daryo” / Husan Sobitov

“Sankt-Peterburg”, Sankt-Peterburg

Rossiyada 7 ta o‘yin o‘tkaziladi: guruh bosqichining 6 ta va chorak final 1 ta o‘yini. Avvaliga 4 ta o‘yin o‘tkazilishi ko‘zda tutilgandi. Ammo Irlandiyaning potytaxti Dublin rad javobini bergach, o‘yinlar Peterburgga ko‘chirildi.

Tashkiliy qo‘mita rahbari Aleksey Sorokin o‘yinlar minimal cheklovlar bilan o‘tkazilishini aytib o‘tdi.

“Yevropa chempionatiga optimizm bilan qarayapmiz. Biz stadionning 50 foizini to‘ldirish bo‘yicha kelishuvga erishganmiz. Chet etldan kelgan muxlislarni ham kiritishga ruxsat olish bo‘yicha ish olib boryapmiz. Rossiyadagi o‘yinlar minimal cheklovlar va qoidalarga zid bo‘lmagan tarzda bo‘lib o‘tadi, deb umid qilamiz”, — dedi Sorokin.

Foto: “Daryo” / Husan Sobitov

“Estadio de la Kartuxa”, Sevilya

Avvaliga E guruhi va Ispaniya terma jamoasining o‘yinlari Bilbaoda bo‘lishi aytilgan edi. Lekin basklar mamlakati epidemiologik xavfsizlik talablariga javob bermagani uchun o‘yinlarni qabul qilish huquqidan mahrum bo‘ldi. Barcha o‘yinlar Sevilyaga ko‘chirildi. Bu variantni Ispaniya futbol federatsiyasining o‘zi taklif qildi. 60 ming muxlis sig‘adigan stadionga 20 mingga yaqin muxlis tashrif buyurishiga ruxsat berildi.

Ispaniya terma jamoasi bu qarordan xursand: Sevilyada basklar mamlakatidan ko‘ra qo‘llab-quvvatlaydigan muxlislar ko‘p bo‘ladi. Bilbaoliklar Ispaniya terma jamoasi uchun unchalik jon kuydirishmaydi.

Foto: “Daryo” / Husan Sobitov

“Alyans Arena”, Myunxen

Tashkiliy qo‘mita xabariga ko‘ra Myunxendagi asosiy stadionga epidemiologik vaziyatga qarab 14,5 ming muxlis (20%) kiritilishi mumkin.

Foto: “Daryo” / Husan Sobitov

“Pushkash Arena”, Budapesht

Barcha tribunalarini ochadigan yagona stadion. “Pushkash Arena” hozircha stadionda muxlislar soniga cheklov qo‘ymayapti.

“Biz epidemiologik vaziyatga qarab stadionga muxlislarni kiritmoqchimiz. Lekin xavfsizlik talablariga yuqori darajada mas’uliyatni his qilgan holda yondashamiz”, — deb aytib o‘tdi Vengriya futbol assotsiatsiyasi vakili.

Foto: “Daryo” / Husan Sobitov

“Olimpiya stadioni”, Baku

Ozarbayjon hukumati stadionning 50% qismiga (34 ming muxlis) ruxsat bera olishini ma’lum qildi.

“Olimpiya stadioni”da yuqori darajadagi terma jamoalar o‘yinlari o‘tishi ko‘zda tutilmagan. Faqatgina Turkiya terma jamoasining o‘sha stadionga tashrifi katta qiziqish uyg‘otishi mumkin.

Foto: “Daryo” / Husan Sobitov

“Stadio Olimpiko”, Rim

Aynan Italiya poytaxtida Yevro—2020 ning dastlabki o‘yini bo‘lib o‘tadi. UEFA ma’lumotiga ko‘ra stadionga 17,6 ming muxlis kirishiga ruxsat bor.

Foto: “Daryo” / Husan Sobitov

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!