Ўзбекистон
Яқиндагина Самвел Бабаян билан келишувга эришган «Навбаҳор» жамоа таркибини кучайтириш йўлидаги ишларини бошлади. Ҳозирда Наманган клубида 5 нафар легионер кўрикдан ўтмоқда. Улар орасида икки нафар бразилиялик футболчи ҳам бор. Шунингдек, яна икки нафар ўйинчи Сербиядан таклиф қилинган. Бундан ташқари, Россиядан ташриф буюрган футболчи ҳам «лочинлар» сафидан жой олишга ҳаракат қилиб кўради. Клуб матбуот хизмати хабарига кўра, кўрикка келган беш футболчидан фақат икки нафари танлаб олинади.
«Турон» эса 2020 йилги мавсумда Тожикистон чемпионатининг энг яхши ҳимоячиси деб топилган Фирдавс Чакалов билан шартнома имзолади. Чакалов бунгача «Хўжанд» клуби шарафини ҳимоя қилган.
Жаҳон
Аргентина терма жамоаси билан илк совринини қўлга киритган Лионель Месси Копа Америка—2021 мусобақасидаги ғалабасини Аргентина халқи ва афсонавий Диего Марадона хотирасига бағишлашини маълум қилди.
«Ақл бовар қилмас мусобақа бўлди. Барча футболчилар бор кучини бериб ҳаракат қилди. Ушбу жамоанинг сардори бўлиш бахтига муяссар бўлганимдан фахрланаман. Мен бу ғалабани оиламга, дўстларимга ва бизга ишонган барча инсонларга бағишламоқчиман. Аввало, коронавирус пандемияси сабаб оғир вақтни бошдан кечирган 45 миллион аргентиналикка. Бу ғалаба барчамиз ва албатта, қаерда бўлмасин, бизни қўллаб-қувватловчи Диего Марадона учун», — дея ёзади Месси ўз Instagram саҳифасида.
Бир ой давомида барча футбол ихлосмандлари эътиборини тортган Евро—2020 ўз ниҳоясига етди. Финал ўйинида Италия пенальтилар сериясида Англияни мағлубиятга учратди. Мусобақа давомида ўтказилган 51 ўйинда жамоалар томонидан умумий ҳисобда 142 та гол киритилди. Шу тариқа мусобақа тарихидаги сермаҳсуллик борасидаги рекорд янгиланди. Бундан аввалги рекорд 2016 йилда қайд этилганди — 108 та гол.
Шунингдек, мусобақа якунларига кўра номинациялар бўйича энг яхшилар аниқланди:
- энг яхши футболчи — Жанлуижи Доннарумма (Италия);
- энг яхши тўпурар — Криштиану Роналду, 5 та гол (Португалия);
- энг яхши ассистент — Стивен Зубер, 4 та узатма (Швейцария);
- энг яхши ёш футболчи — Педри (Испания);
- энг яхши дарвозабон — Жордан Пикфорд (Англия).
Виржил ван Дейк жароҳатидан фориғ бўлиб, «Ливерпуль»нинг умумий гуруҳ машғулотларига қўшилди. Нидерландиялик ҳимоячи 2020/21 йилги мавсум аввалида тиззасидан жиддий жароҳат олиб, узоқ муддатга сафдан чиққанди.
11 июль куни футбол бўйича КОНКАКАФ Олтин Кубоги старт олди. Мусобақада 16 та жамоа 4 та гуруҳга бўлинган ҳолда ўзаро баҳс олиб боради.
11 ва 12 июль кунлари А ва В гуруҳларида 1-тур ўйинлари ўтказилди. B гуруҳида АҚШ Гаитини (1:0), Канада Мартиникани (4:1) мағлуб этиб, 3 очкодан жамғарган ҳолда етакчилик қилмоқда. А гуруҳида Мексика Тринидад Тобаго билан муроса йўлини танлади (0:0), Салвадор эса Гватемаладан 2:0 ҳисобида устун келди.
MMA
Конор Макгрегорнинг Дастин Порьега қарши жангида синдириб олган оёғи операция қилинди. Маълумотларга кўра, операция жараёни 3,5 соат давом этган. Унинг катта болдир суягига стержен ўрнатилган, кичик болдир суягига эса пластина ва винт қўйилган. Конорнинг ўзи олти ҳафтадан сўнг қайтишини маълум қилди.
Шунингдек, унинг Порье билан жангдан қанча ишлаб олгани ҳам маълум бўлди. The Sports Daily’нинг ёзишича, Макгрегор 5 миллион 11 минг доллар гонорар олган. Дастин Порьеда эса бу кўрсаткич 1 миллион 21 минг долларга тенг.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)