Ислом динида вакцина олишга тақиқ йўқлиги маълум қилинди. Бу ҳақда Халқаро пресс-клубда Ўзбекистон мусулмонлари идораси раисининг биринчи ўринбосари Ҳамиджон Ишматбеков айтиб ўтди, дея хабар бермоқда «Gazeta.uz».
Таъкидланишича, ислом динининг асосий таълимотлари 5 та нарсани асрашга, ҳимоя қилишга қаратилган. Шулардан энг муҳими, энг асосийси бу инсон ҳаётини сақлаш.
«Шариат аҳкомларига қарайдиган бўлсак, динимиз кўп нарсаларни ё енгиллаштириб беради, ёки баъзи ҳолатларда айрим нарсалардан воз кечишга чақиради. Ҳатто динимизда ҳаром дейилган нарсалар инсоннинг соғлиғини сақлашда шундан бошқа чора қолмаса, ўша нарсадан фойдаланиш ёки уни истеъмол қилишга ҳам рухсат беради», — деди Ҳамиджон Ишматбеков.
Унинг қўшимча қилишича, айни вақтда вакциналар чиқяптими, мутахассислар бу борада ишлаяптими, демак, бу ҳам Худонинг марҳамати.
«Бизга савол ҳам келади, вакцина баъзи ножоиз нарсалардан тайёрланаётган экан, деган мазмунда. Аслида ундай эмас. Бўлган тақдирда ҳам бир нарса бошқа нарсага ўтганда, у ўзгаради деган қоидалар бор. Бу дорими, дорилик шароитига келгунча у асли ҳолатдан ўзгариб кетади. Шунинг учун бу нарсаларга эътибор бериш керак эмас. Мутахассис шуни даво деб тайинладими, демак, бу ҳалол томонга ўтди деган хулосани беряпмиз», — дейди Ўзбекистон мусулмонлари идораси раисининг биринчи ўринбосари.
Мавзуга доир:
Изоҳ (0)