АҚШ Афғонистондан ўз қўшинларини олиб чиққанидан кейин ҳам Афғонистонда ва бошқа минтақаларда терроризмга қарши курашиш имкониятига эга бўлади. Бу ҳақда Пентагон вакили Жон Кирби айтиб ўтди, деб ёзмоқда «Интерфакс».
Ушбу имкониятлар орасида у Яқин Шарқдаги базаларни эслатиб ўтди ва улар ёрдамида минтақада учувчили ва учувчисиз ҳаво воситаларидан фойдаланиш мумкинлигини айтди. Шунингдек, Афғонистон яқинидаги авиаташувчи зарба гуруҳи қўшимча имкониятларни тақдим қилишда давом этмоқда. Шу билан бирга, Кирбининг сўзларига кўра, АҚШ Афғонистонга қўшни давлатларнинг ҳудудларидан фойдаланган ҳолда «қўшимча имкониятларни ўрганишда» давом этади. Унинг таъкидлашича, бу билан АҚШ Марказий қўмондонлиги раҳбари генерал Фрэнк Маккензи, давлат департаменти ва давлат котиби Энтони Блинкен шахсан шуғулланмоқда.
«Аммо менда бу масала бўйича бугун хабар беришим мумкин бўлган бирорта имзоланган битим йўқ», — деди Кирби.
«Биз тараққий этяпмиз, бу борада жуда қаттиқ меҳнат қиляпмиз. Аммо Америка халқи ватанига таъсир кўрсатадиган террорчилик таҳдидларига қарши курашни давом эттириш учун бизда ҳақиқатан ишончли, истиқболли имкониятлар борлигига ишонч ҳосил қилишини истайман», — дея таъкидлади у.
Матбуот котибининг сўзларига кўра, Афғонистонда «Толибон» «ўнлаб туман марказларини эгаллаб олгани бу ҳақиқат». Унинг таъкидлашича, шунинг учун «ушбу ҳарбий можарони музокаралар орқали сиёсий йўл билан ҳал қилишни давом эттириш жуда муҳим».
АҚШ президенти Жо Байден АҚШ қўшинларини Афғонистондан олиб чиқиш жараёни 31 августда тугашини маълум қилганди. Унинг таъкидлашича, АҚШ қўшинларини олиб чиқиш жараёни «хавфсиз ва тартибли» бормоқда. Байден Америка ҳарбийлари ўз зиммасига юкланган вазифаларини бажариб бўлганини айтди.
Дастлаб АҚШ қуролли кучларини олиб чиқиб кетиш 2021 йил 11 сентябргача якунланиши режалаштирилган эди. Кейинчалик бу жараён кутилганидан тезроқ кетаётгани ва шунинг учун август ойида тугаши мумкинлиги маълум бўлди.
Байденнинг таъкидлашича, кучларни олиб чиқиш жараёнининг тез бориши миссия АҚШ ҳарбийлари учун иложи борича хавфсизроқ бажарилишига имкон берадиган заруратдир.
Байден қўшинлар кетгач, Афғонистондаги ҳокимият тепасига «Толибон»нинг келишини муқаррар деб билмаслигини айтди. Унинг сўзларига кўра, Кобулнинг ихтиёрида 300 минг кишилик қўшин бор, уларга қарши «Толибон» аъзолари эса 75 мингга яқин кишини ташкил қилади. АҚШ президентининг сўзларига кўра, афғон армияси «яхши қуролланган, тайёргарлиги юқори ва жанг қилишга қодир».
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак.
Аввалроқ «Толибон» барча чет эл қўшинлари Афғонистонни ўз муддатида тарк этишини талаб қилгани ҳақида хабар берилганди. АҚШ Афғонистондан ўз қўшинларини олиб чиқиш амалиёти август охирига қадар тугашини маълум қилди.
Бугунга қадар Германия ва Италия Афғонистондан ўз қўшинларини олиб чиқишни якунлади.
Изоҳ (0)