Тошкентдаги «Ўзэкспомарказ»нинг 1 ва 2-павильонларида 750 ўринли тақсимлаш маркази иш бошламоқда. Бу ҳақда пойтахт ҳокимлиги матбуот хизмати хабар берди.
Кадр: Telegram
Тошкент шаҳар ҳокими Жаҳонгир Ортиқхўжаев Соғлиқни сақлаш вазирлиги масъуллари иштирокида тақсимлаш марказида яратилган шароитлар билан танишган ва беморларни қабул қилиш жараёнларини соддалаштириш бўйича тавсияларни берган.
Таъкидланишича, Тошкентдаги тақсимлаш марказларига беморларни нафақат тез тиббий ёрдам машиналарда, балки шахсий автоуловларда ҳам етказиш мумкин.
Аввалроқ Тошкент шаҳрида ДХХ тасарруфидаги «Ёшлик» спорт мажмуасида, ИИВ тасарруфидаги «Универсал» спорт мажмуасида 700 койка-ўринга мўлжалланган ковид-марказ қайтадан ташкил этилгани тўғрисида хабар берилганди.
Мавзуга доир:
Эслатиб ўтамиз, 2020 йил ноябрь ойининг охирларида «Атлас» ва «Ёшлик» коронавирусга ихтисослашган марказлари, 2020 йил 9 декабрь куни эса «Ўзэкспомарказ»даги ковид-марказ ёпилганди. Ўшанда касаллик динамикаси ошганда ёпилган объектлар тезкор равишда қайта очилиши маълум қилинганди.
Мамлакатда кунлик касалланиш ҳолатлари сони яна ортиб бормоқда. Шу сабабли республика бўйлаб 28 июндан карантин чекловлари кучайтирилди. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилди.
