Сурхондарё вилояти Жарқўрғон туманида захирадаги ерни сотмоқчи бўлган шахс ушланди, дея хабар бермоқда Бош прокуратура ҳузуридаги департамент матбуот хизмати.
Маълум қилинишича, департаментнинг Жарқўрғон туман бўлими томонидан ўтказилган тезкор тадбирда фуқаро Н.М. ноқонуний даромад орттириш мақсадида аслида туман ҳокимлиги захирасида бўлган 0,25 гектар ерни фуқаро А.га фирибгарлик йўли билан сотишни режалаштириб, туман кадастр ва давлат хизматлари марказида ишловчи танишлари орқали ҳужжатларни тайёрлаб бериш эвазига 70 миллион сўмни олган вақтда ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Бундан аввал ДХХ Бўстонлиқда от спортига ажратилган 25,4 гектар ерни 1,5 млн долларга сотмоқчи бўлган шахсни қўлга олгани, Сурхондарёда 50 сотих ерни ўзига тегишли эканлигига ишонтириб, 150 млн сўмга сотмоқчи бўлган шахс ушлангани ҳамда Тошкентда вазирликда ишлашини айтиб, ўқишга киритиб қўйиш эвазига фуқародан 10 минг доллар олган шахс ушлангани ҳақида хабар берилганди.
Изоҳ (0)