Хоразмда 48 килограммдан ошиқроқ каннабис ўсимлигини парваришлаб келган шахс аниқланди

Хоразм вилоятида уйида гиёҳванд моддаси етиштирган шахс ушланди, дея хабар бермоқда ИИВ матбуот хизмати.

Қайд этилишича, 2021 йил 30 июнь куни Хоразм вилояти ИИБ Транспортда ХТБ ходимлари томонидан гиёҳвандлик моддаси сотаётган вақтида қўлга олинган 1987 йилда туғилган Урганч тумани Ғойбу қишлоғида яшовчи, А.С.нинг жиноят иши тергови давомида, ушбу фуқаро Бошқарма бошлиғи номига пушаймонлик аризаси билан мурожаат қилиб, унга марихуана гиёҳванд моддасини сотган О. исмли шахсни жиноят устида ушлашда ёрдам беришини билдирган.

Аризага мувофиқ, 2021 йилнинг 4 июль куни Транспортда ХТБ ЖҚБ ходимлари томонидан ўтказилган тезкор-тадбир давомида, 1983 йилда туғилган Урганч тумани Қорамон қишлоғи «Каттабоғ» маҳалласида яшовчи М.О. Урганч шаҳар Ислом Каримов кўчасида жойлашган Марказий деҳқон бозори яқинида тадбирга жалб қилинган харидор А.С.га 400 000 сўм эвазига, 2 дона «Спички» ёзувли гугурт қутичаси ичига жойлаштирилган, ЭКБнинг хулосасига кўра 5,03 грамм «марихуана» гиёҳванд моддасини сотган вақтида ушланган.

Шунингдек, фуқаро М.О.нинг яшаш уйи орқа томонида жойлашган боғнинг экиш майдони холислар иштирокида кўздан кечирилганида, боғ ичидаги иссиқхонада ЭКБнинг хулосасига кўра 43 туп бўйи 0,90 сантиметрдан – 2,62 метргача бўлган, вазни 48 килограмм 762 грамм ҳўл холдаги каннабис гиёҳвандлик ўсимлигини экиб парваришлаб келаётганлиги аниқланди.

Мазкур ҳолат юзасидан тергов ҳаракатлари олиб борилмоқда.

Бундан аввал Тошкентда тиббий ниқобга гиёҳвандлик воситасини яширган фуқаро қўлга олингани, Тошкентда сигарета қутисида гиёҳванд модда олиб юрган шахс қўлга олингани ҳамда ДХХ Ўзбекистонга Тожикистондан контрабанда йўли билан олиб кирилган катта миқдордаги гиёҳвандлик моддаларини мусодара қилгани ҳақида хабар қилингани ҳақида хабар берилганди.