Самарқандда туркиялик ҳайдовчиларнинг икки юк машинаси ёниб кетди

Самарқанд вилоятининг Жомбой туманида туркиялик ҳайдовчиларнинг икки юк машинаси ёниб кетди. Бу ҳақда вилоят ФВБ матбуот хизмати хабар берди.

Маълум қилинишича, 5 июль куни соат 01:35 да Жомбой туманининг Буюк ипак йўли кўчасида жойлашган автотурагоҳда турган ҳайдовчи Т.К. бошқарувида бўлган Volvo юк машинаси тўлиқ, ҳайдовчи С.К. бошқарувидаги Iveko юк машинаси эса қисман ёнган. Ҳар икки юк машинаси Қирғизистонга тегишли бўлган, ҳайдовчилар эса Туркия фуқаролари бўлган.

Воқеа жойига 4 та ёнғин-қутқарув экипажи соат 01:48 да етиб бориб, ёнғин 02:05 да ўраб олиниб, 02:40 да ўчирилган.

Ҳодиса оқибатида жароҳат олганлар йўқ. Ёнғиннинг сабаби ва зарари аниқланмоқда.

Бундан аввал Янгийўлда юк машинасидан ёнғин чиққани, Қашқадарёда ҳаракатланиб кетаётган комбайн ёниб кетгани, Жиззахда газ заправкада турган Matiz ва Nexia ёниб кетгани, Қамчиқ довонида «бензовоз» ёниб кетиши оқибатида икки киши ҳалок бўлгани ҳақида хабар берилган эди.