Шерзод Асадов: «Бугунги кунда Ўзбекистонда 40 миллион тоннадан ортиқ мис захираси аниқланган»

Президент Шавкат Мирзиёев қарорига асосан, Ўзбекистонда мис саноати кластери ташкил этилади. Бу ҳақда 5 июль, душанба куни ўтказилган брифингда давлат раҳбари матбуот котиби Шерзод Асадов сўз юритди, дея хабар бермоқда «Дарё» мухбири.

«Ўзбекистон Президенти 28 июнь куни мис ишлаб чиқаришни янада ривожлантириш ҳамда саноат кластерини ташкил этиш масалалари юзасидан йиғилиш ўтказди.

Давлатимиз раҳбари бу соҳага алоҳида эътибор қаратаётганлари бежиз эмас. Халқаро экспертларнинг фикрича, электромобиллар, электротехника ва қайта тикланувчи энергия соҳаларининг ривожланиши эвазига 2030 йилга бориб дунёда мисга бўлган талаб 40 фоизга ошиши кутилмоқда.

Ўзбекистонда эса бу бозорни эгаллаш бўйича жуда катта имконият бор. Охирги йилларда геологик қидирувларга ажратилган маблағлар натижасида юртимизда янги-янги конлар топилмоқда. Хусусан, бугунги кунда 40 миллион тоннадан ортиқ мис захираси аниқланган.

Энг асосийси, давлатимиз раҳбари энди мисни қуруқ хом ашё шаклида эмас, балки уни қайта ишлаб, қўшилган қийматли маҳсулот сифатида сотиш талабини қўймоқдалар», — деди Асадов.

Унинг таъкидлашича, ҳозирги кунда Ўзбекистон миснинг қарийб 60 фоизини хом ашё сифатида экспорт қилмоқда.

«Мисдан келадиган даромад 2,5 миллиард долларни ташкил этяпти. Келгуси 5 йилда мис ишлаб чиқариш ҳажмини 400 минг тоннагача етказиш орқали бу кўрсаткични, турдош тармоқлар билан бирга, 7—8 миллиард долларга етказиш мумкин.

Шунингдек, мис ишлаб чиқаришда 1 та иш ўрни ташкил этилса, кластер усулида унга боғлиқ электротехника, машинасозлик, инжиниринг каби соҳаларда 6 тагача иш ўрни яратилади, яъни иш ўринлари 6 баробар кўпаяди. Шу мақсадда, Президентимиз қарорига мувофиқ, Мис саноати кластери ташкил этилмоқда. Ушбу кластер томонидан лойиҳалаштиришдан тортиб тайёр маҳсулот ишлаб чиқаришгача бўлган барча жараёнлар тизимли йўлга қўйилади.

Бундан ташқари, геология-қидирув ишлари ҳам давом эттирилади. Давлатимиз раҳбари йиғилишда рангли ва ноёб металларни қидирув ишларини кенгайтириш бўйича 5 йиллик дастур ишлаб чиқиш бўйича топшириқ бердилар», — деди Президент матбуот котиби.