App Annie мобил таҳлил хизмати маълумотларига кўра, мобил VPN’нинг оммалашуви Ўзбекистонда кескин ўсди, деб хабар беради Spot.
VPN дастурлари App Store’да биринчи иккита ўринни эгалламоқда:
Google Play’да топ-3 тага кирди:
2 июль куни Ўзбекистонда TikTok, Twitter ва «ВКонтакте» ижтимоий тармоқлари фаолияти вақтинчалик чеклангандан сўнг VPN’ларга қизиқиш ортди (бунга мамлакат ташқарисида бўлган ўзбекистонликларнинг шахсий маълумотларини сақлаш ва қайта ишлаш сабаб бўлган).
Мазкур ҳолатни графикдаги динамикадан ҳам кўриш мумкин — ижтимоий тармоқларнинг чекланишидан олдин VPN дастурлари ҳатто топ-50 га ҳам кирмаган:
Сўнгги марта VPN дастурларини бундай катта юклаб олиш кўрсаткичлари 2018 йилда, Facebook ва YouTube мамлакатда блокланганида кузатилган эди.
«Gazeta.uz»нинг ёзишича, ижтимоий тармоқларга чекловлар ўрнатилгандан сўнг турли хил Telegram каналларда Ўзбекистонда VPN’дан фойдаланганлик учун жиноий жавобгарлик борлиги тўғрисида маълумотлар тарқалган. Аммо бу ундай эмас.
2018 йилда ҳақиқатан ҳам жавобгарлик жорий этилган эди, аммо телекоммуникация тармоғига ноқонуний кириш учун — бунинг VPN билан ҳеч қандай алоқаси йўқ. Шундан сўнг Ахборот технологиялари ва коммуникацияларини ривожлантириш вазирлиги мазкур фарқни батафсил баён қилган эди.
Наманган вилояти ҳокими Шавкатжон Абдураззоқов 3 июль куни ёшлар кўпроқ китоб ва газеталарни ўқишлари учун ижтимоий тармоқларни бир ойга ёпишни таклиф қилди. Ўз навбатида, депутат Расул Кушербаев ахборот асрида ижтимоий тармоқларни чеклашни кулгили ва абсурд қарор деб атади.
2019 йил ёзида ўша пайтдаги Президент Администарсияси ҳузуридаги Ахборот ва оммавий коммуникациялар агентлигининг директори Комил Алламжонов Alter Ego лойиҳасига берган интервьюсида YouTube ва Facebook’ка чекловлар қўйганлар энди «қамоқда» эканликларини таъкидлаган. Унинг сўзларига кўра, шу йўл билан улар салбий маълумотлар оқимини камайтиришга ҳаракат қилган.
Комил Алламжонов таъкидлашича, интернетни ўчириб қўйиш орқали ҳеч нарсага эришиб бўлмайди. Бундан ташқари, VPN’ларнинг тобора оммалашиб бориши кўплаб керак бўлмаган манбаларга кириш имкониятини очади ва шу билан хавфсизлик тизимларини йўқ қилади.
Изоҳ (0)