Зангиотадаги коронавирусга чалингани гумон қилинган беморларни даволашга мўлжалланган юқумли касалликлар шифохонаси беморлар билан тўлди. Бу ҳақда «Ўзбекистон 24» телеканали орқали маълум қилинди.

Фото: «Дарё» / Мадина Нурман

«Касалхонамиз 2 минг койкага мўлжалланган. Аммо айни вақтида 2550 нафар бемор даволанмоқда. Коронавирусга чалинганлар сони, айниқса, ҳомиладор аёллар ва болалар орасида кескин ошиб кетди. Блокларда беморлар сони ортиб кетгани сабаб болаларни катталар учун мўлжалланган палаталарга жойлаштиришга мажбур бўляпмиз. Вазият шуни кўрсатмоқдаки, вакцинациясиз муаммони бартараф этиб бўлмайди», — дейди Зангиота 1-сон юқумли касалликлар шифохонаси директори ўринбосари Олимжон Исоқов.

Унинг сўзларига кўра, охирги вақтларда ҳар куни 350 га яқин инсон касалхонага ётқизилмоқда. Бўш койка-ўринлар қолмагани сабаб касалхонага беморларни қабул қилиш тўхтатилган. Реанимацияда ётган беморларнинг барчаси вакцинациядан ўтмаган.

Зангиота 2-сон юқумли касалликлар шифохонасида мавжуд 2 мингта койка-ўринда фақат 300 таси ҳозирча бўш (2 июль ҳолатига кўра). Аммо шифокорларнинг айтишича, касаллар сонининг бу каби ортиши сабаб бир—икки кунда улар ҳам тўлади.

Аввалроқ июнь ойи охирида Зангиота 1-сон юқумли касалликлар шифохонаси директори Анвар Ҳусанов «айни пайтда 2016 та ўринга эга бўлган шифохонада 1,4 мингдан ортиқ бемор белгиланган стандартлар бўйича даволанаётгани»ни маълум қилган эди. Ўша вақтда 232 ўринли реанимация бўлимларида 29 та бўш жой борлиги таъкидланган эди.

Коронавирус инфекцияси тарқалиши билан боғлиқ вазият оғирлашгани муносабати билан 28 июндан 12 июлгача кучайтирилган карантин тадбирлари кўрилиши эълон қилинган эди (амалда ушбу тадбирларнинг асосан емакхоналар фаолиятини 20:00 дан кейин тўхтатиш қисми бажарилди, холос). 2 июлдан Тошкентда вақтинчалик ковид-марказлар фаолияти қайта тиклана бошланди.