Zangiotadagi kovid-kasalxonada bemorlarning katta navbati yuzaga kelgani aks etgan video yuzasidan izoh berildi

Ijtimoiy tarmoqlarda Zangiotadagi koronavirusga chalingani gumon qilingan bemorlarni davolashga mo‘ljallangan yuqumli kasalliklar shifoxonasi koridorlari odamlar bilan to‘la ekani (ularning aksariyati kasallikka chalingani taxmin qilinmoqda), tartibsiz muhit yuzaga kelgani, har yoqdan yo‘tal ovozlari eshitilayotgani aks etgan videoyozuvlar tarqaldi.

Zangiota 2-son yuqumli kasalliklar shifoxonasi direktori Doniyor Mirazimov “Daryo” muxbiri bilan suhbatda videoyozuvlardagi holat haqiqatan ham Zangiotadagi kasalxonada yuz bergani, bunday holat 1-iyul kuni soat 19:00 atrofida kuzatilganini tasdiqladi.

“Bemorlar oqimi keskin oshib ketganligi va ular saralanmagani, barcha bemorlarning MSKT, rentgen, PZR analizlarini olib, saralash uchun ko‘p vaqt va resurs talab etilgani sababli shunday tirbandlik paydo bo‘lgan”, — deydi shifokor Mirazimov.

Kasalxona rahbarining qo‘shimcha qilishicha, videoda aks etgan holat (“tirbandlik”) soat 22:00 ga kelib bartaraf etilgan, buning uchun barcha bo‘lim mudirlari, katta hamshiralar va bo‘sh personal yordamga safarbar qilingan.Avvalroq, iyun oyi oxirida Zangiota 1-son yuqumli kasalliklar shifoxonasi direktori Anvar Husanov “ayni paytda 2016 ta o‘ringa ega bo‘lgan shifoxonada 1,4 mingdan ortiq bemor belgilangan standartlar bo‘yicha davolanayotgani”ni ma’lum qilgan edi. O‘sha vaqtda 232 o‘rinli reanimatsiya bo‘limlarida 29 ta bo‘sh joy borligi ta’kidlangan edi.

Koronavirus infeksiyasi tarqalishi bilan bog‘liq vaziyat og‘irlashgani munosabati bilan 28-iyundan 12-iyulgacha kuchaytirilgan karantin tadbirlari ko‘rilishi e’lon qilingan edi (amalda ushbu tadbirlarning asosan yemakxonalar faoliyatini 20:00 dan keyin to‘xtatish qismi bajarildi, xolos). 2-iyuldan Toshkentda vaqtinchalik kovid-markazlar faoliyati qayta tiklana boshlandi.