Коронавирусга қарши курашиш штаби аъзоси, тиббиёт фанлари доктори Севара Убайдуллаева 2 июль, жума куни АОКАда бўлиб ўтган брифингда сурункали касалликлари бўлмаган, карантин қоидаларига риоя қилувчи, иммунитети кучли кишилар вакцина олмаса ҳам бўладими, деган саволга жавоб берди.
«Сизнинг иммунитетингиз қанчалик мустаҳкам бўлса-да, ҳеч қандай сурункали касалликларингиз бўлмаса-да, карантин қоидаларига риоя қилсангиз-да, оила аъзоларингиз ёки ҳамкасбларингиз сизчалик карантин қоидаларига риоя қилмаётган бўлиши мумкин. Агар улардан кимлардир карантин қоидаларига риоя қилмаслиги билан касаллик яширин кечаётган одам билан контактда бўлиб қолиб, касаллик юқтириб олса, сиз ниқоб тақмаган пайтингизда улардан касаллик юқтириб олишингиз ҳам мумкин», — дейди Севара Убайдуллаева.
Унинг сўзларига кўра, бугунги кунда бутун дунёда ва Ўзбекистонда тарқалаётган вируснинг штаммлари юқиши оқибатида ўзининг жадал кечиши ҳамда яширин равишда организмни кучли жароҳатлаши кузатилмоқда.
«Сиз организмингизда кечаётган жараённи билмай ҳам қолишингиз мумкин. Вакцина эса касалликдан ҳимоя ва агарда вакцина олиш жараёнида касаллик юқиб қолса ҳам енгил кечишига таъсир қилади ва бу инсонни оғир ҳамда ўта оғир даражада касаллик ўтказишдан ҳимоя қилади», — дейди Коронавирусга қарши курашиш штаби аъзоси.
Севара Убайдуллаеванинг айтишича, вакцина қайси давлатда ишлаб чиқилганидан қатъи назар, бугунги кунда кузатилаётган вируснинг юқумлилиги кучайган штаммни енгиш учун ягона ҳимоя воситасидир. «Бу вакцинани олишингиз керак», — деб таъкидлади у.
Аввалроқ Севара Убайдуллаева организмда антитаналар юқори бўлса ҳам вакцина олиш мумкинми, деган саволга жавоб берганди, шунингдек, нега вакциналарни икки ёки уч марта олиш кераклиги ҳақида маълумот берганди.