АҚШ президенти Жо Байден маъмурияти Марказий Осиёнинг уч давлатидан Афғонистондаги НАТО қўшинлари чиқиб кетгунга қадар 9 мингга яқин Афғонистон фуқаросини вақтинча қабул қилишини сўради. Мазкур фуқаролар АҚШ ҳарбийлари билан ишлаган ва эндиликда «Толибон»нинг ўч олишидан қўрқмоқда, деб ёзади Bloomberg бу борадаги мунозаралардан хабардор икки манбага асосланиб.
Нашрда қайд этилишича, АҚШ Ўзбекистон, Қозоғистон ва Тожикистонга АҚШ ҳарбийларига ёрдам берган афғонларни вақтинча қабул қилишни сўраб мурожаат қилган.
«Ушбу келишув Афғонистон масаласида Марказий Осиё мамлакатлари билан келгуси ҳамкорликни ривожлантириш бўйича кенгроқ битимнинг бир қисми бўлади. Ўзбекистон ва Тожикистон ташқи ишлар вазирлари шу ҳафта Вашингтонда бўлиб турибди. Томонлар АҚШга ўз ҳудудидан разведка, кузатув ва текширув олиб боришга имкон берадиган битимни муҳокама қилмоқда», — деб ёзган нашр.
Associated Press хабар беришича, АҚШ ҳарбийлари Афғонистондаги энг йирик авиация базаси Баграмдан воз кечиб, уни «исёнчиларнинг янги ҳудудларни эгаллашини тўхтатиш учун курашаётган» Афғонистон мудофаа кучларига топширган. Ҳозирда «Толибон» мамлакатдаги 400 та туманнинг ярмини назорат қилмоқда, деб таъкидлайди Bloomberg.
«Президент Жо Байденнинг Афғонистон президенти Ашраф Ғани ва Афғонистон Миллий ярашув кенгаши раиси Абдулла Абдуллага афғон кучларига миллиардлаб долларлик ҳарбий ва молиявий ёрдам беришда давом этиши ҳақидаги ваъдасига қарамай, Афғонистон раҳбарлари яқинда фуқаролик уруши юз бериши мумкинлиги ёки барча хорижий кучлар чиқиб кетганидан кейин ҳукумат қулашидан ҳадиксирамоқда», — дея таъкидланган нашрда.
Аввал Оқ уй маъмурияти йигирма йиллик можаро пайтида АҚШ ҳарбий кучлари билан ҳамкорлик қилган ва «Толибон»нинг жазосидан қўрққан афғонларга иммиграцион визаларни беришни тезлаштиришга ваъда берганди. Буни АҚШда ишлаганларга муҳожир мақомини олиш учун ариза бериш имкониятини тақдим этувчи Махсус иммиграция визаси (СИВ) дастури орқали амалга ошириш режалаштирилган. Расмий маълумотларга кўра, СИВ учун 18 мингга яқин ариза берилган, жараён ҳозирча уларнинг 9 мингтаси бўйича бошланган.
Эслатиб ўтамиз, Америка ва НАТО мамлакатлари қўшинлари 29 апрелдан Афғонистондан чиқиб кетишни бошлади. Июнь ойи бошида АҚШ Афғонистондан ўз қўшинларининг учдан бир қисмини олиб чиқиб кетгани хабар берилганди. Шунингдек, Афғонистондаги НАТО миссияси тугагандан сўнг Туркия ҳарбий кучлари Кобул аэропорти хавфсизлигини таъминлашда етакчи ролни эгаллаши ҳақида АҚШ ва Туркия президентлари Жо Байден ва Ражаб Тоййиб Эрдўғон келишиб олган эди.
Associated Press хабарига кўра, АҚШ қўшинларининг асосий қисмини олиб чиққанидан кейин Афғонистонда 650 га яқин америкалик ҳарбийни қолдирмоқчи. Таъкидланишича, Афғонистонда қоладиган ҳарбийлар дипломатларнинг хавфсизлигини таъминлайди.
Бугунга қадар Германия ва Италия Афғонистондан ўз қўшинларини олиб чиқишни якунлади.
Изоҳ (0)