Қозоғистонда 1 июль куни «Халқ саломатлиги тўғрисида»ги кодекснинг янги нормаси кучга кирди. Бу ҳақда «Sputnik Казахстан» хабар берди.
Энди Қозоғистонда тамаки маҳсулотларини дўкон пештахталарига очиқдан очиқ териб қўйиш тақиқланади. Бу чекувчилар ва чекишни ташлашга уринаётганларнинг импулсив харидларига йўл қўймаслик мақсадида амалга оширилади.
Ушбу тақиқ нафақат анъанавий сигареталарга, балки тамакини тутатадиган маҳсулотларга (IQOS, GLO), калян учун тамаки, калян аралашмаси, тамакини қиздириш тизимлари, электрон истеъмол тизимлари ва улар учун фойдаланиладиган суюқликларга ҳам тегишли.
Тамаки харидорлари оқ қоғозда қора ранг билан ёзилган матн орқали дўконда мавжуд тамаки маҳсулотларининг тури ва нархларини билиб олиши мумкин. Қоғозга ҳар қандай график ёки чизилган расмларни жойлаштириш тақиқланади. Рўйхат кўриб чиқилгандан сўнг харидорга унинг талабига биноан тамаки маҳсулотлари кўрсатилиши мумкин.
Бундан ташқари, 1 июлдан бошлаб бир қути сигаретанинг чакана нархи 520 тенге (тахминан 13 минг сўм) этиб белгиланди. Минимал нарх 2021 йил 31 декабргача амал қилади. Шундан сўнг ҳар олти ойда сигареталарнинг минимал нархи босқичма-босқич 600 тенгегача (15 минг сўмгача) оширилади.
Эслатиб ўтамиз, 2020 йилда Қозоғистонда тамаки маҳсулотларини 21 ёшдан кичик фуқароларга сотиш тақиқлаб қўйилганди.
Изоҳ (0)