Бугун,

  • USD 11014.01
  • RUB 191.8
  • EUR 10674.78

Жиззахда 35 ёшли эр Telegram’даги ёзишмалари сабаб 28 ёшли хотинини бўйнидан пичоқлаб ўлдиргани ҳақида хабар берилган эди. Вилоят ИИБ матбуот хизмати унга нисбатан суд ҳукми ўқилганини маълум қилди.

Қайд этилишича, 30 март куни судланувчи бир неча танишлари билан кафега бориб, спиртли ичимлик истеъмол қилган. Тунги соат 22:00 лардан сўнг уйига кириб борганидан сўнг турмуш ўртоғини хиёнатда гумон қилиб, унинг телефонидаги кириш-чиқиш қўнғироқлар рўйхати, SMS хабарлари ҳамда ижтимоий тармоқлардаги мулоқотлари мазмуни текшириб чиққан.

Бу жараёнда эркак тахминий хаёл ва фаразлар билан қасддан низо келтириб чиқарган. Бошланган даҳанаки жангда у аёлни хиёнат қилмаганлиги ҳақида қасам ичирган, аммо бунга ҳам ишонмаган рашкчи эр ошхона пичоғи билан хотинининг бўйин қисмини жароҳатлаган.

Кейин акасига қўнғироқ қилиб, «Ички ишлар органларини чақиринг, келинингизни ўлдириб қўйдим, уйдан қизимни олиб кетинг», деб айтган.

Суд давомида эркак қилмишига тўлиқ иқрор бўлган. Унга 14 йилга озодликдан маҳрум қилиш жазоси тайинланган.

Бундан аввал Қашқадарёда хотини билан жанжаллашган эркак уйини портлатиб юборгани, Фарғонада эр Туркияга кетмоқчи бўлган хотинини рашк сабаб ўлдириб қўйгани, Ургутда хотинини маст ҳолда бўғиб ўлдирган эркак 11 йилга қамалгани ҳақида хабар берилганди.

Изоҳ
Асосий янгиликлар