Чехия ташқи ишлар вазирининг ўринбосари Мартин Смолек Россия элчиси Александр Змеевскийга Чехиянинг Врбетица қишлоғидаги ўқ-дорилар омборларида содир бўлган портлашлар оқибатидаги зарарни тўлашни талаб қилувчи нота топширди. Портлашларда Россия махсус хизматларининг қўли бор дея гумон қилинаётганди. Бу ҳақда Чехия ташқи ишлар вазирлиги сайтига таяниб, Meduza хабар берди.
Москва Чехиянинг зарарни қоплаш тўғрисидаги ушбу даъвосини товламачилик сифатида қабул қилди. Россия Ташқи ишлар вазирлигининг расмий вакили Мария Захарова ўзининг Telegram-каналида Чехия «қилинмаган иш учун» товон пули талаб қилаётганини ёзди.
«Шуни эслатиб қўймоқчиман. Одатда бундай усулда, яъни судсиз ва терговсиз, таҳдид ва ҳақорат билан пул талаб қиладиганларни товламачилар дейишади», — қўшимча қилган Захарова.
Чехиянинг йирик нашри Млада фронта Днес хабар беришича, Чехия ҳукумати зарарни 650 миллион чех кронаси (25,5 миллион евродан кўпроқ) деб баҳолаган. Май ойида Чехия молия вазири Алена Шиллерова Россиядан бир миллиард чех кронаси талаб қилиниши мумкинлигини айтганди.
Чехиянинг Врбетица қишлоғидаги қурол-аслаҳа омборларида 2014 йил октябрь ойида портлашлар содир бўлган. Ўшанда икки киши вафот этган.
2021 йилнинг апрель ойида Чехия расмийлари ушбу воқеада Россия махсус хизматларини айблади. Бунинг ортидан Чехия 18 нафар россиялик дипломатни мамлакатдан чиқариб юборди. Шунингдек, Чехия бош вазири Андрей Бабиш Евроиттифоқ мамлакатлари раҳбариятини Чехия ҳукумати билан бирдамлик рамзи сифатида ҳеч бўлмаганда бир нафардан Россия дипломатларини чиқариб юборишга чақирди.
Май ойи ўрталарида Чехия президенти Врбетицадаги портлашлар сабабини камомадни яширишга уриниш деб атади. Шунингдек, у воқеа сабабининг дастлабки версияси ўқ-дориларни сақлашда бепарволикка йўл қўйилиши эканини эслатиб ўтди. Бош вазир ва адлия вазири эса воқеада фақат Россиядан гумон қилинаётганини таъкидлади.
Шундай вазиятда Россия Ташқи ишлар вазирлиги Чехиянинг Врбетицадаги портлашларга оид текширувини чалкаш деб атади ва бирор тайинли натижага эришиш ҳам даргумонлигини айтди.
Изоҳ (0)