Швеция бош вазири истеъфога чиқди. Унга ишончсизлик вотуми эълон қилинганди

Швеция бош вазири Стефан Лёвен парламент раисига истеъфога чиқиш тўғрисида ариза топширди. Бош вазир ўтган ҳафта парламентдан ишончсизлик вотуми олганидан сўнг шундай қарорга келди, деб ёзади «РБК».

Маҳаллий қонунчиликка мувофиқ, Лёвенга ўз раҳбарлиги остида янги ҳукумат коалициясини тузиш учун тун ярмигача (28 июнь) вақт берилганди. Аммо охир-оқибат социал-демократлар етакчиси бўлган Лёвен марказчи партиялар билан келиша олмади.

Швеция парламенти 1958 йилдан буён биринчи марта ҳукумат раҳбарига ишончсизлик вотуми эълон қилганди. Агар парламент аъзолари мамлакат бош вазирига ишончсизлик билдирса, ҳукумат истеъфога чиқиши ёки қўшимча сайлов тайинлаши керак.

Лёвенга ишончсизлик билдириш масаласини «Швеция демократлари» партияси овозга қўйди. Бунга уй эгаларига турар жой учун ижара ҳақини эркин белгилашга имкон берадиган янги қонун лойиҳаси сабаб бўлди. Бош вазир ушбу қонун лойиҳасини илгари сурган. Маҳаллий The Local нашрининг аниқлик киритишича, мамлакатда ижарага беришнинг қатъий қоидалари мавжуд бўлиб, улардан бири шундан иборатки, уй эгалари ижарага берадиган турар жойи нархини мустақил белгилай олмайди, аксинча, фақат «ўртача ижара ҳақи» олиши мумкин.

Бундай қоидани бекор қилиш таклифи парламентдаги сўлчилар орасида Швеция ижтимоий моделига зид ва ижарачиларга таҳдид сифатида қабул қилинди.

Лёвен 2018 йилда Швеция ҳукумати раҳбари сифатида иш бошлаган. Вазирлар Маҳкамаси тузилишидан олдин тўрт ойлик музокаралар бўлиб ўтган. Натижада, социал-демократлар ва «яшиллар» партиясининг коалицияси либераллар ва сўл партиялар билан янги кабинет ишига аралашмаслик тўғрисидаги келишув туфайлигина маъқулланди. Июль бошида сўл партия келишувлардан чиқишга қарор қилганидан кейин вазият ўзгарди.

Reuters суҳбатдошларининг фикрига кўра, ҳозирги сиёсий инқироз узоқ давом этиши мумкин: сўровлар шуни кўрсатадики, сўлчиларда ҳам, ўнгчиларда ҳам ҳукумат тузиш эҳтимоли деярли тенг, шу сабабли тез орада янги коалиция тузилишига кафолат йўқ.