Москвада бир ҳафталик жазирама иссиқдан сўнг, 28 июнь куни «супер жала» ёғди. Куннинг ўрталарига келиб пойтахтдаги баъзи йўлларни сув босди, шамол биноларнинг томларини қисман учириб кетди. Пойтахтдаги кучли ёғингарчилик оқибатлари ҳақида «РБК» фоторепортаж тайёрлади.
Москвада 28 июнь куни об-ҳаво ёмонлаша бошлади. Фавқулодда вазиятлар вазирлиги кун охиригача шаҳарда нафақат ёмғир ёғиши, балки момақалдироқ бўлиши, 23 м/секундгача тезликда шамол эсиши ва дўл ёғиши ҳақида огоҳлантирди.
Ёмғир туфайли метрополитеннинг иккита қисмида поездлар ҳаракати дарҳол тўхтатилди. Ерости йўлини сув босди. Автомобиллар ғилдираги сув остида қолган. Шунингдек, йўлларни, Боровский шоссесининг бир қисмини ҳамда пиёдалар йўлакларини сув босди.
Сув тошган йўллар ва қулаган дарахтлар туфайли автобус ва трамвайлар ҳаракатида узилишлар бўлди. Ноқулай об-ҳаво пойтахт аэропортлари ишига ҳам таъсир кўрсатди. Шереметьевода 11 та, Домодедово ва Внуковода 13 тадан рейс кечиктирилди. Учала аэропортда жами 10 та рейс бекор қилинди.
Кучли шамол «Правда» газетаси комбинати биносининг томини учириб юборди. Бино жойлашган кўчада транспорт ҳаракатининг иккала йўналиши ҳам беркилди. Шунингдек савдо марказларидан бирининг томи ҳам қисман қулаб тушди, Новокосинода шамол қурилиш майдонидаги изоляторни учириб кетди.
Подмоскове ҳам жиддий зарар кўрди. Раменскоеда кучли шамол туфайли қурилиш крани қулаб тушди. Шелковода трансформатор буткасини чақмоқ уриб ёниб кетди. Москванинг баъзи туманларига бир неча соат ичида бир ойлик ёғингарчиликнинг 70 фоизи тушди. Жануби-ғарбий қисмдаги сув тошқини айниқса кучли бўлди. (53 миллиметргача).
Изоҳ (0)