Ҳиндистонда 3 мингдан ортиқ киши «қора замбуруғ»дан вафот этди

Ҳиндистонда мукормикоз («қора замбуруғ») билан касалланиш бўйича 40 845 та ҳолат аниқланди, ушбу инфекция туфайли 3129 киши вафот этди. Бу ҳақда Ҳиндистон Соғлиқни сақлаш вазирлигига таяниб, «РБК» хабар берди.

«Қора замбуруғ» билан касалланганларнинг 34 344 нафарида касаллик бурун бўшлиғида ривожланган, бу эса мияга таъсир қилади.

Май ойида Ҳиндистоннинг Ражастан ва Телангана штатлари мукормикоз эпидемиясини эълон қилди — замбуруғ касаллиги биринчи навбатда, коронавирус билан оғриганларда қайд этилганди.

Маълумот учун, мукормикоз табиатда кенг тарқалган микроскопик замбуруғлар (мукормицетлар) келтириб чиқарадиган ноёб инфекция. Улар тупроқда яшайди, кўпинча чириган ўсимликлар ва сабзавотлар юзасида ажралиб туради.

Ҳиндистонда COVID пандемияси фонида одамларнинг хавфли замбуруғларга чалиниш ҳолатлари кўпайди. Мамлакатда коронавирус тарқалишининг иккиламчи таъсири сифатида пайдо бўлган «қора замбуруғ» эпидемияси фонида яна бир замбуруғ касаллиги аниқланди, у мамлакатда «оқ замбуруғ» деб аталади.

Май охирида Ҳиндистон шифокорлари коронавирусга чалинган беморда замбуруғ инфекциясининг учинчи тури — «сариқ замбуруғ»ни аниқлади. Мамлакатда «сариқ замбуруғ» билан касалланган биринчи бемор вафот этди.

Июнь ўртасида эса Ҳиндистонда COVID-19’га чалинган беморда «яшил замбуруғ» аниқланди.

Айни пайтда мамлакатда 30,2 миллиондан ортиқ кишида COVID-19 қайд этилган, шулардан 396 мингдан ортиғи вафот этган.