Chexiya Vrbetitsa qishlog‘ida sodir etilgan portlashlar bo‘yicha tekshiruv jarayonida chalkashlikda qoldi va biror tayinli natijaga erishishi ham dargumon. Bu haqda Rossiya tashqi ishlar vaziri Sergey Lavrovning so‘zlariga tayanib “Izvestiya” xabar berdi.

Foto: Global Look Press

“Ko‘rib turganingizdek, Chexiya yetti yil oldin sodir bo‘lgan portlashlar haqidagi voqeani sharmandalik bilan hal qilmoqda. Shu yillar davomida tergov organlari nima bilan shug‘ullanganini hali hech kim tushuntirib berolmadi, ular o‘z ko‘rsatmalarida chalkashib ketdi, tobora yangi versiyalarni ilgari surmoqda”, — dedi Lavrov.

Uning ta’kidlashicha, avval tergovni yakunlash, so‘ngra ba’zi xulosalar chiqarish, bundan tashqari, diplomatlarni chiqarib yuborish to‘g‘risidagi qarorni tergov bilan bog‘liq holda qabul qilish kerak.

“Hali tekshiruv tugamagan ishda diplomatlarni ayblab, mamlakatdan chiqarib yuborishdan oldin bunday masalalarni avval o‘zlari hal qilishi kerak. Chexiya olib borayotgan uslubga ko‘ra, tekshiruvning aniq bir natija bilan tugashi dargumon”, — dedi TIV rahbari.

Shu kuni Xalqaro gumanitar va siyosiy tadqiqotlar instituti eksperti Vladimir Bruter “Izvestiya” gazetasiga Vrbetitsadagi portlashlar sababi bo‘yicha Chexiya bosh vaziri Andrey Babish va mamlakat adliya vaziri Mariya Beneshova hamda prezident Milosh Zeman o‘rtasidagi tortishuvlar to‘g‘risida fikr bildirdi.

Zeman voqea yuzasidan bir nechta versiyalar tekshirilayotgani haqidagi bayonotidan farqli o‘laroq, Babish politsiya Rossiya maxsus xizmatlari bilan bog‘liq bo‘lgan yagona versiya bilan ish olib borayotganini aytgan.

Chexiya prezidenti Vrbetitsadagi portlashlar sababini kamomadni yashirishga urinish deb atagan. Shuningdek, u voqea sababining dastlabki versiyasi o‘q-dorilarni saqlashda beparvolikka yo‘l qo‘yilishi ekanini eslatib o‘tgan.

Bosh vazir va adliya vaziri voqeada faqat Rossiyadan gumon qilinayotganini ta’kidlagan.

Avvalroq Chexiya Vrbetitsadagi portlashlar uchun Rossiyadan 47 million dollar tovon puli talab qilmoqchiligi haqida xabar berilgandi.

Shuningdek, Chexiya bosh vaziri Andrey Babish Yevroittifoq mamlakatlari rahbariyatini Vrbetitsa qishlog‘idagi portlashlar haqidagi ish bo‘yicha Chexiya hukumati bilan birdamlik ramzi sifatida hech bo‘lmaganda bir nafardan Rossiya diplomatlarini chiqarib yuborishga chaqirgan edi.

Chexiya Rossiyani 2014-yil 17-aprelda Moraviyaning janubi-g‘arbiy qismidagi o‘q-dorilar omborida sodir bo‘lgan portlashlarga aloqadorlikda ayblaganidan keyin ular o‘rtasidagi keng ko‘lamli siyosiy-diplomatik nizo paydo bo‘ldi. Shundan so‘ng Praga qiymati 6 milliard yevro bo‘lgan “Dukovani” atom elektr stansiyasining yangi energiya blokini qurish bo‘yicha tenderda ishtirok etish uchun “Rosatom” davlat korporatsiyasining nomzodlar safidan chiqarilishini e’lon qildi.

Buning ortidan Chexiya 18 nafar rossiyalik diplomatni mamlakatdan chiqarib yubordi. Bunga javoban Moskva ham 20 nafar chexiyalik diplomatni mamlakatdan chiqarib yubordi.