Биринчи тижорий антивирус — McAfee’ни яратган 75 ёшли Жон Макафи Барселона қамоқхонасида ўлик ҳолда топилди. Бу ҳақда Каталония Адлия департаментига асосланиб Reuters хабар берди.
Дастлабки маълумотларга кўра, Макафи ўз жонига қасд қилган, деб ёзади Испаниянинг El Diario ва El Pais нашрлари ўз манбаларига асосланиб.
Макафи 2020 йилнинг октябридан бери Испания ҳибсхонасида эди. У Барселона аэропортида АҚШ Адлия вазирлигининг илтимосига биноан ҳибсга олинган. АҚШ Макафини солиқларни тўлашдан бўйин товлашда, криптовалюта фирибгарлигида ва «пул ювиш»да айблаган.
15 октябрда Макафи ўз жонига қасд қилиш нияти йўқлиги ҳақида Twitter’да хабар қолдирган. У ҳамма нарсадан мамнун экани ва дўстлари борлигини таъкидлаган. «Билингки, агар мен (Жеффри) Эпштейн сингари ўзимни осиб қўйсам, бу менинг айбим бўлмайди», — деб ёзган дастурчи. Ўша пайтда Макафининг қамоқда сақланаётганига қарийб икки ҳафта бўлган эди.
Макафининг ўлимидан сал аввал, 23 июнь куни Испания суди унинг АҚШга экстрадициясини маъқуллаган эди.
Жон Макафи 1987 йилда дунёдаги энг йирик антивирус дастурларини ишлаб чиқарувчилардан бирига айланган McAfee компаниясига асос солган. 1994 йилда Макафи ушбу бизнесдан чиқиб кетган.
2008 йилда Макафининг бойлиги 100 миллион долларга баҳоланган. Аммо 2009 йилда The New York Times бизнесменнинг бойлиги тўрт миллионгача камайгани ҳақида ёзган ва буни Макафининг глобал иқтисодий инқироз фонидаги муваффақиятсиз инвестициялари билан изоҳлаган.
2016 ва 2020 йилларда Макафи Либертариан партиясидан АҚШ президентлигига номзодини қўйишга ҳаракат қилган.
Изоҳ (0)