Россия Федерал оператив штаб маълумотларига кўра, ўтган кун давомида Москва ва Санкт-Петербургда COVID-19’дан ўлимлар сони бўйича рекорд ўрнатилди. Бир суткада Санкт-Петербургда 99 киши, Москвада 92 киши касалликдан вафот этган.
Қайд этилишича, пандемия бошланганидан бери Россиядаги йирик шаҳарларнинг ҳеч бирида бир кунда бунчалик кўп бемор вафот этмаган. Аввалги рекорд 23 июнь куни ўрнатилган, ўшанда COVID-19 туфайли Санкт-Петербургда 93 киши ва Москвада эса 88 киши вафот этган.
Сўнгги 24 соат ичида бутун Россияда коронавирусга чалиниш бўйича 20 182 та янги ҳолат аниқланди. Шунингдек, 568 киши касалликдан вафот этди, бу 28 январдан буён энг юқори кўрсаткич. Москва ва Санкт-Петербург билан бир қаторда ўлим кўрсаткичи бўйича қуйидаги минтақалар етакчилик қилмоқда:
- Бурятия — 23;
- Нижегород вилояти — 22;
- Свердловск вилояти — 17;
- Краснодар ўлкаси — 17;
- Москва вилояти — 16.
Аввалроқ Россияда COVID-19’га қарши эмланмаган фуқароларга чекловлар қўйиш бошлангани ҳақида хабар берилганди.
Россия ҳудудларида COVID-19 билан касалланишнинг ортиши фонида у ёки бу шаклда мажбурий вакцинация бошланди, асосан, хизмат кўрсатиш, савдо, соғлиқни сақлаш, транспорт ва маданият соҳалари ходимлари, шунингдек, мансабдор шахслар мажбурий эмланмоқда. Аксарият ҳудудларда ходимларнинг камида 60 фоизи қисқа муддат ичида эмланиши лозим. Айни пайтда Федерация таркибига кирувчи 85 ҳудуднинг 11 тасида юқоридаги соҳа вакиллари учун вакцинация мажбурий этиб қўйилди.
Изоҳ (0)