АҚШ Афғонистонда 650 га яқин ҳарбийни қолдирмоқчи — ОАВ

Афғонистондан ҳарбий контингентнинг асосий қисми олиб чиқиб кетилганидан кейин Афғонистонда қарийб 650 нафар америкалик ҳарбий хизматчи қолади. Бу ҳақда Associated Press расмий шахслардан иборат манбаларига таяниб хабар бермоқда.

Нашр маълумотларига кўра, Афғонистонда қоладиган ҳарбийлар дипломатларнинг хавфсизлигини таъминлайди. Яна бир неча юзлаб ҳарбий хизматчилар Кобул аэропортида қолиб, Туркияга хавфсизликни таъминлашда кўмаклашади.

AP манбаларига кўра, Америка ва халқаро кучларнинг Афғонистондан олиб чиқиб кетилиши 4 июлга қадар юз беради.

Июнь ойи бошида АҚШ Афғонистондан ўз қўшинларининг учдан бир қисмини олиб чиқиб кетгани хабар берилганди. Шунингдек, Афғонистондаги НАТО миссияси тугагандан сўнг Туркия ҳарбий кучлари Кобул аэропорти хавфсизлигини таъминлашда етакчи ролни эгаллаши ҳақида АҚШ ва Туркия президентлари Жо Байден ва Ражаб Тоййиб Эрдўғон келишиб олган эди.

Аввалроқ «Толибон» Афғонистоннинг Тожикистон билан чегарадаги ҳудудини эгаллаб олгани ҳамда тожик-афғон чегарасидаги вазият кескин деб баҳоланаётгани ҳақида хабар берилганди. Кейинроқ Афғонистонда ҳукумат қўшинлари «Толибон» жангариларини мамлакат шимолидаги бир нечта туманлардан сиқиб чиқаргани маълум бўлди.

Эслатиб ўтамиз, апрель ойида АҚШ президенти Жо Байден Афғонистондан Америка қўшинларини олиб чиқиб кетиш бошланганини эълон қилган эди. Унинг сўзларига кўра, ҳарбийлар минтақада уларнинг олдига қўйилган барча мақсадларга эришган. Қуролли кучларни 11 сентябргача тўлиқ чиқариб кетиш режалаштирилган. Америка ва НАТО мамлакатлари қўшинлари 29 апрелдан чиқиб кетишни бошлади. Айни вақтда АҚШ давлат котиби Энтони Блинкен Афғонистондан қўшинлар чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмади.

Шунингдек, Америка разведкаси Афғонистондан АҚШ қўшинларини олиб кетиш жараёни тугаганидан сўнг олти ой ўтиб Афғонистон ҳукумати қулаши мумкин, деган фикрда.