Қозоғистон пойтахти Нур-Султонда карантин чоралари кучайтирилди. Бу ҳақда пойтахт бош санитария шифокорининг янги қарорига асосланиб, Tengrinews хабар берди.
Хабарга кўра, коронавируснинг пайдо бўлиши ва тарқалишининг олдини олиш бўйича идоралараро комиссия йиғилишининг 22 июндаги баённомаси асосида пойтахтнинг бош давлат санитария шифокори Сарҳат Бейсенова Нур-Султонда чеклов ва карантин чораларини кучайтириш тўғрисида фармон имзолади.
Бош санитария шифокори Нур-Султон аҳолиси ва меҳмонларига қуйидаги талабларга риоя қилишни белгилаб берди:
- Оммавий тадбирларни, шу жумладан, уйда ташкил қилинадиган оилавий зиёфатлар, тўйлар, юбилейлар ва бошқаларни ўтказиш ва уларда қатнашиш тақиқланди. Ушбу тадбирларни Ashyq лойиҳасига киритилган биноларда ўтказиш бундан мустасно.
- Фаолияти тикланмаган объектларга: боулинг марказлари, компьютер клублари, PlayStation клублари, кинотеатрлар, билярд хоналари, караоке, кинотеатрлар, батутлар, тунги клублар, букмекерлар, ўйин клублари ва бошқаларга ташриф буюрмаслик сўралади (Ashyq лойиҳасида иштирок этадиган объектлар бундан мустасно).
- Жамоат жойларига, жумладан, шаҳар жамоат транспортига ва фаолиятига рухсат берилган объектларга боришда, шунингдек, жамоат жойларида очиқ ҳавода бўлганида ниқоб тақиш, масофани сақлаш ва антисептиклардан фойдаланиш талабларига қатъий риоя қилиш сўралади.
- Якка тартибда ва камида 5 метрлик ижтимоий масофани сақлаш шарти билан 5 кишидан кўп бўлмаган шахслар гуруҳида очиқ ҳавода спорт машғулотларини ўтказишга рухсат берилади.
Санитария шифокори Ashyq лойиҳасини қуйидаги бизнес объектларида давом эттиришга қарор қилди: фитнес-клублари, шу жумладан, ёга марказлари, курорт марказлари, сауналар, сузиш ҳавзалари, компьютер клублари, PlayStation клублари (16 ёшгача бўлганлар бундан мустасно), умумий овқатланиш шохобчалари, вилоятлараро ва шаҳар туристик транспорт, биллиард клублари, концерт заллари ва бошқалар.
Бундан ташқари, ишлаб чиқариш эҳтиёжига қараб мулкчилик шаклидан қатъи назар, давлат органлари, миллий компаниялар, корхоналар маъмурий ходимларининг камида 80 фоизини масофавий ишлаш шаклига ўтказиш назарда тутилган. Шу билан бирга, COVID-19’га қарши эмлашнинг тўлиқ курсини олган ва сўнгги 3-6 ой ичида COVID-19’дан даволанган барча ходимлар учун офлайн режимда ишлашга рухсат берилади.
Университет ва коллеж талабалари учун якуний имтиҳонлар масофадан туриб ўтказилади. Битирув кечаларини ташкил этиш ва ўтказиш ҳамда университет ва коллежларда дипломларни офлайн режимда топшириш тақиқланди.
Савдо-кўнгилочар марказлар, савдо уйлари фаолиятига иш кунлари соат 10.00 дан 17:00 гача рухсат берилади, шанба ва якшанба кунлари ишлаш тақиқланди. Ушбу марказларда жойлашган озиқ-овқат ва дорихоналар, COVID-19’га қарши оммавий эмлаш пунктлари бундан мустасно.
Умумий овқатланиш корхоналари (ресторанлар, кафелар, барлар, ошхоналар), жойлашиш жойидан қатъи назар, кучайтирилган чора-тадбирларга риоя қилган ҳолда ва қўшни столлар орасида камида икки метр ижтимоий масофани сақлаган ҳолда соат 07.00 дан 20.00 гача фақат иш кунлари ташриф буюрувчиларга хизмат қилади. Шунингдек, иш ва дам олиш кунлари соат 07.00 дан 22.00 гача етказиб бериш ва олиб кетиш режимида ишлайди.
Ёпиқ озиқ-овқат ва ноозиқ-овқат бозорлари соат 10.00 дан 20.00 гача фақат иш кунлари очиқ бўлади.
Аввалроқ Қозоғистонда коронавируснинг «ҳиндча» штамми туфайли карантин чоралари кучайтирилиши мумкинлиги хабар қилинганди. Қозоғистонда санитария-эпидемиологик вазият барқарор, аммо пойтахт Нур-Султонда «ҳиндча» штамм тарқалиш эҳтимоли мавжуд.
Нур-Султон ҳокимлиги аниқлик киритишича, «ҳиндча» штамм пайдо бўлиш эҳтимолини ҳисобга олган ҳолда, пойтахтда 54 нафар бемор қўшимча текширувдан ўтказилган. Беморларнинг 56 фоизида дельта штамми борлиги аниқланган. Шу сабабли Нур-Султон шаҳри ва бошқа вилоятларда санитария-эпидемиологик талабларни кучайтириш бўйича чоралар кўриб чиқила бошланган.
Изоҳ (0)