Канаданинг Саскачеван провинцияси туб аҳолиси жамоатчилиги вакиллари Канада туб халқларининг болалари учун мўлжалланган собиқ мактаб-интернат ҳудудида 751 та номаълум қабр топилгани ҳақида хабар берди, деб ёзади CBC.
Мактаб-интернат 1899—1997 йилларда фаолият олиб борган. Унинг ҳудудида қабристон бор ва ундан номсиз қабрлар топилган. Георадар ёрдамида топилган ушбу қабрларда кимлар дафн этилгани ҳали номаълум.
Маҳаллий аҳоли орасида тарқалган миш-мишларга кўра, қабристонда мактаб-интернатдаги болалар ҳам, катталар ҳам дафн этилган. Тахмин қилинишича, номсиз қабрларда 1960 йилларга қадар исмлар ёзилган тахталар бўлган, аммо кейинчалик улар олиб ташланган.
Канадада туб аҳолининг фарзандлари учун интернат мактаблари 19-асрнинг ўрталаридан 20-асрнинг охирларига қадар мавжуд бўлган. Бундай мактабларда 150 мингдан ортиқ бола ўқитилган, улар оилаларидан олиб қўйилиб, мажбурий ассимиляция қилинган. Мактаб-интернат тарбияланувчилари зўравонликларга дучор бўлган, яхши овқатланиш ва даволанишдан маҳрум қилинган.
2021 йил май ойида Британиянинг Колумбия провинциясидаги собиқ мактаб-интернати ҳудудида 200 дан ортиқ боланинг қолдиқлари бўлган йирик қабр топилганди. Канада бош вазири Жастин Трюдо оммавий қабрни «Канада тарихидаги қоронғу ва шармандали бобнинг оғриқли нишонаси» деб атади.
Изоҳ (0)