Айни пайтда Президент Шавкат Мирзиёев раислигида Андижон вилояти фаоллари билан ўтказилаётган йиғилишда давлат раҳбари Қўрғонтепа туманилик тадбиркор аёлни юксак мукофот билан тақдирлади. Бу ҳақда «Дарё» мухбири хабар бермоқда.
«Мана, кеча мен билан учрашган Умидахон Усмонова ўз хонадонида етарли шароит йўқлигига қарамасдан, ҳаттоки уйининг меҳмонхонасида парранда боқиб, аҳолига тарқатиб келмоқда. У бугунгача 23 минг бош хонаки товуқ тарқатган.
Бу тадбиркор ва шижоатли аёлнинг ‘Урганжи’ маҳалласида қилган ишлари менга жуда маъқул бўлди. Шунинг учун ‘Микрокредитбанк’ бу тадбиркор синглимизга 5 миллиард сўм миқдорида фоизсиз кредит ажратади.
Яна бир алоҳида совғамиз бор — ҳозир сизларнинг кўз олдингизда Умидахон синглимга ‘Меҳнат шуҳрати’ орденини топшираман», — деди Президент.
17 июнь куни Шавкат Мирзиёев Избоскан туманидаги «Урганжи» маҳалласида Қурбонали Ўринбоев хонадонида бўлган эди. «Gazeta.uz»нинг маълум қилишича, айни шу хонадонда давлат раҳбари Умида Усмоновани мукофотлаши ҳақида айтган.
«Мен сиздан миннатдорман. Мен сизга ‘Меҳнат шуҳрати’ орденини бераман. Хонадонда шундай ҳаракат қилиб, ўзбек аёли шундай меҳнат қилган бўлса, менинг ислоҳотларим амалга ошяпти, мен бахтиёрман. Сизнинг тимсолингиз элга ярашади. Сизнинг тимсолингиз халқимизга намуна бўлади», — деган Президент.
«‘Урганжи’ маҳалла фуқаролар йиғини бошлиғи Нафосатхон деган аёл мени Қўрғонтепага излаб борибди. Опажон, мен сизнинг тажрибангизни ўрганмоқчиман. Уни ‘Урганжи’ маҳалласида қўлламоқчиман, деганидан кейин, аввало, хурсанд бўлдим. Кейин уларга ёрдам беришга киришдим. 10-15 кундан бери шу маҳаллада фаоллик қилиб, паррандачилик йўналишида маслаҳат бериб келмоқдаман. Нафосатхон айтди, нега Қўрғонтепа аёллари қилган ишни ‘Урганжи’ аёллари қила олмайди, деди. Биз ҳозир ҳамкорликда ишлаяпмиз. ‘Урганжи’ аёлларининг қилаётган меҳнатларини, мен орқали йўналишлар кетаётганига юртбошимиз хурсанд бўлиб, мени мукофотладилар», — деган «Ўзбекистон 24» телеканалига интервью берган тадбиркор.
Эслатиб ўтамиз, Шавкат Мирзиёев ҳудудлардаги ўзгаришлар, аҳоли ҳаёти билан яқиндан танишиш мақсадида 17 июндан буён Андижон вилоятида бўлиб турибди. Давлат раҳбари сафарини Избоскан туманининг энг чекка ҳудудлардан бири — «Қўғай» маҳалласидан бошлаб, ушбу маҳалладаги тўқимачилик корхонасини, «Рустамжон Замин ривожи» фермер хўжалиги даласида ғалла ҳосилини бориб кўрди. Шундан сўнг Пахтаобод туманидаги инновацион иссиқхонани кўздан кечирди. Бу ерда Президент Андижонда металл конструкциялар корхонаси ташкил этишга кўрсатма берди.
Президент, шунингдек, Андижон шаҳридаги қаровсиз бинолар ўрнида ташкил этилган янги корхоналарнинг иш фаолияти билан танишди, Андижон вилояти Бош жоме масжидини бориб кўрди.
Изоҳ (0)