Президент Шавкат Мирзиёев Андижон фаоллари билан ўтказилаётган йиғилишда вилоятда гулчиликни ривожлантиришга алоҳида эътибор бериш кераклигини қайд этиб ўтди, деб хабар беради «Дарё» мухбири.
Давлат раҳбарининг сўзларига кўра, Андижондаги 27 та маҳаллада 5 мингга яқин хонадон томорқасида гул етиштириш йўлга қўйилиб, камида 10 минг нафар аҳоли бандлигини таъминланиш зарур.
Таъкидланишича, Андижон, Избоскан, Олтинкўл туманларида кластер усулида гулчилик ривожлантирилади. Жумладан, Андижон туманидаги «Андижон гуллар боғи» корхонасини кластерга айлантириб, 30 гектар ерда гул ва манзарали кўчатлар етиштириладиган боғ барпо этиш керак.
«Ҳусанов, Абдураҳмонов 1 октябрга қадар Шаҳрихон туманида аҳолини касб-ҳунарга ўқитиш маркази қошида гулчилик мактабини ташкил этиб, чет элдан малакали мутахассисларни жалб этади. Шунингдек, вилоятда гулчилик соҳасидаги тажрибали тадбиркорларни жалб этиб, ҳар бири 2 сотихдан иборат 20 та иссиқхона қурган ҳолда уларда ўқув-амалиётларини ташкил этиши керак.
Гулчилик даромад манбаи бўлиши билан бирга, хонадонимизнинг ҳам, кўнглимизнинг ҳам янада обод ва гўзал бўлишига хизмат қилади. Шунинг учун гулчилик бўйича ҳам Андижон тажрибасини яратиш керак», — дейди Президент.
Аввалроқ Шавкат Мирзиёев Андижонга ташрифини Избоскандаги тўқимачилик корхонасини бориб кўришдан бошлагани, Андижонда металл конструкциялар корхонаси ташкил этишга кўрсатма бергани ҳамда Избоскан туманидаги «Рустамжон Замин ривожи» фермер хўжалиги даласида ғалла ҳосилини кўргани ҳақида хабар берилганди.
Мавзуга доир: «Андижондаги 100 та маҳалла ҳалигача ўз ихтисослашув йўлини топмаган» — Шавкат Мирзиёев
Изоҳ (0)