Москва маъмурий автомагистрал инспекцияси такси компанияларидан хорижий ҳайдовчилик гувоҳномасига эга ва тажрибаси бўлмаган ҳайдовчилар билан шартномаларни тўхтатишни талаб қилди. Бу ҳақда «Incrussia.ru» нашри хабар берди.
«Йил давомида МАДИ инспекторлари уч йилдан кам ҳайдовчилик тажрибасига эга бўлган чет эллик ҳайдовчиларга оид 1,7 мингдан ортиқ ҳолатни қайд этган. Бу эса амалдаги қонунчиликни бузилишидир», — дея изоҳ берган инспекция.
Қонунга кўра, мамлакатда фақат Россия ёки Қирғизистон ҳайдовчилик гувоҳномасига эга ҳайдовчилар таксичилик қилиши мумкин. Шунингдек, шаҳар ҳокимлиги рус тили расмий тил сифатида қўлланиладиган мамлакатларнинг ҳайдовчилик гувоҳномаси билан ишлашга рухсат берилгани, ҳайдовчи камида уч йиллик ҳайдаш тажрибасига эга бўлиши кераклигини тушунтирган.
Инспекциянинг маълум қилишича, 1 августдан бошлаб Москвада такси хизмати ишлашни назорат қилиш тизими иш бошлайди. Унга кўра, ҳар бир ҳайдовчига идентификация рақами берилади, бу эса ноқонуний ҳаракатларни чеклайди.
Эслатиб ўтамиз, Россияда 2017 йил 1 июндан такси, автобус, «маршрутка» ва юк машиналари ҳайдовчиларининг хорижий ҳайдовчилик гувоҳномалари билан ишлашини тақиқловчи қонун кучга кирган. Қонун 2013 йилдаёқ қабул қилинган, бироқ унинг кучга кириши мунтазам кечиктириб келинаётган эди. Шунга қарамай, Россияда меҳнат қилаётган минглаб ҳайдовчиларга ушбу қонун таъсир кўрсатган ва мамлакатнинг йирик шаҳарларида вақтинчалик такси етишмовчилиги юзага келтирганди.
Изоҳ (0)