«Замонавий фикрлайдиган ёшлардан бирини ҳоким қиламиз». Шавкат Мирзиёев Янги Андижон шаҳри вилоятнинг драйверига айланишини маълум қилди

Президент Шавкат Мирзиёев Андижон вилояти фаоллари билан ўтказилаётган йиғилишда Янги Андижон шаҳри ҳақида тўхталиб ўтди, деб хабар беради «Дарё» мухбири.

«Хабарларингиз бор, кеча Андижон туманидаги 4 минг гектар адирлик ерларда барпо этиладиган Янги Андижон шаҳрига тамал тошини қўйдик. Ушбу янги шаҳарда жами 130 мингдан ортиқ квартирали кўп қаватли уйлар, таълим, соғлиқни сақлаш, савдо ва хизмат кўрсатиш масканлари, саноат зоналари, яшил ҳудудлар ва инфратузилма объектлари қурилади» — деди Президент.

Давлат раҳбарининг сўзларига кўра, Янги Андижон лойиҳаси – аҳоли учун муносиб турмуш шароитини яратиш билан бирга, улкан қурилиш ва бунёдкорлик ишларини амалга ошириш орқали вилоятни ривожлантириш бўйича янги драйвер бўлади. Жумладан, қурилиш материаллари, электротехника, мебелсозлик, тўқимачилик, полиэстер ва сунъий тола ишлаб чиқариш ва хизмат кўрсатиш каби йўналишларда кўплаб янги лойиҳаларни амалга ошириш учун имконият яратилади.

Таъкидланишича, мазкур улкан бунёдкорлик ишлари 8 та босқичда амалга оширилиб, қурилиш жараёнида 10 мингта янги иш ўрни, шаҳар қурилиши якунланганидан кейин эса саноат ва хизмат кўрсатиш соҳаларида қарийб 100 мингта янги иш жойи яратилади.

«Умурзоқов, Қўчқоров Янги Андижон лойиҳасининг коммуникация тармоқларини қуришни бошлаш учун алоҳида Тикланиш ва тараққиёт жамғармасидан 100 миллион доллар ажратади. Шулардан келиб чиқиб, 2022 йил 1 мартдан бошлаб Андижон тумани таркибида Янги Андижон шаҳри ташкил этилади. Замонавий фикрлайдиган, дунёқараши кенг, фидойи ёшлардан бирини ҳоким қиламиз.

Маҳкамов Янги Андижон ҳудудига тезкор транспорт қатновини ташкил қилиш мақсадида бир ой муддатда таклиф киритсин. Раматов, Зокиров уч ой муддатда Тошкент шаҳрида ва Андижонда Туркиянинг тажрибали лойиҳа компаниялари филиалларини ташкил этиб, мутахассисларни ўқитиш ишларини йўлга қўйсин», — дейди Президент.

Аввалроқ Андижонда «Машинасозлик ва электротехника саноат хаби» махсус зонаси ташкил этилиши, вилоятдаги иқтисодий комплекснинг барча раҳбар ходимлари ишдан олиниб, уч ой муддатга вазифасини бажарувчи этиб тайинлангани тўғрисида хабар берилганди.