Президент Шавкат Мирзиёев раислигида Андижон вилоят фаоллари билан ўтказилаётган йиғилишда давлат раҳбари вилоят иқтисодий комплексининг барча ходими ишдан бўшатилганини маълум қилди. Бу ҳақда «Дарё» мухбири хабар бермоқда.
«Бу сафарги ташриф давомида вилоят ривожига кучли туртки берадиган янги «ўсиш нуқта»ларини шакллантириш ва тўлиқ ишга солиш, аҳоли ҳаётини яхшилаш бўйича асосий йўналиш ва вазифаларни белгилаб олсак, айни муддао бўлади», — дейди Президент.
Давлат раҳбарнинг сўзларига кўра, бугундан бошлаб Андижон вилоятида иқтисодий комплексда ишловчи 5700 нафар ходимнинг барчаси ишдан бўшатилади.
«Ҳаммаси! Улар 3 ой синов муддати берилади, агар аравани торта олса, ишга тикланади, ойлигини ҳам берамиз, керак бўлса мукофот ҳам берамиз. Қани, улар ҳам муаммоларни ўзларида ҳис қилиб кўрсин. Менга насиҳат қилувчилар керак эмас, натижа кўрсатувчи ижро органи керак. Ҳамма шароит яратиб бердимми, энди халққа хизмат қилинглар, натижа кўрсатинглар», — дея таъкидлайди Шавкат Мирзиёев.
Аввалроқ давлат раҳбари Андижондаги иқтисодий комплекснинг барча раҳбар ходимлари ишдан олиниб, уч ой муддатга вазифасини бажарувчи этиб тайинланганини айтганди.
Изоҳ (0)