Москвада светофор тезликни оширган ҳайдовчиларни қизил чироқ билан «жазолашни бошлади»

Москва Транспорт департаменти йўлларда тезлик режимини тартибга солишга қаратилган янги «ақлли» бошқарув тизимини эълон қилди. Департамент ўзининг Telegram’даги канали орқали тизим светофорлардаги қизил чироқни мажбурий ёнишини таъминлайдиган тизим ҳозирча тажриба тариқасида ишга туширилган ва Зеленограднинг фақат битта кўчасида ишламоқда, деб хабар беради Motor.

Тизимнинг ишлаш принципи қуйидагича: йўлдаги асфальт остига махсус детекторлар ўрнатилган бўлиб, улар ўтаётган автомобиль тезлигини ўлчайди. Агарда автомобиль ҳудудда тезликни оширса, энг яқин светофорда қоидабузар ҳайдовчини светофорнинг қизил чироғи «кутиб туради». Шу билан бирга, эълон қилинган видеога кўрсатилишича, қарама-қарши ва ёндош полосадагиларга ҳаракатланишга рухсат берилади, аммо улардан кейинги автомобиль қоидабузар ҳайдовчи билан яшил чироқни кутишга мажбур бўлади.

Ҳозирда ушбу тизим Генерал Алексеев ва Конструктор Гусков кўчалари кесишмасида ишлаяпти, бироқ тажриба муваффақиятли якунланса, «ақлли» светофорлар бошқа чорраҳаларда ҳам пайдо бўлишни бошлайди.

Эслатиб ўтамиз, 2020 йилнинг декабрида Москва Транспорт департаменти Россия пойтахти кўчаларига квадрат шаклидаги бешта янги светофорларни ўрнатганди.