Chevrolet моделлари Россия бозорига қайтганига бир йил тўлиб, автомобиль ишлаб чиқарувчи мамлакатда сотилган машиналар статистикаси билан бўлишди, деб хабар беради Motor. Аниқланишича, 2020 йилда мамлакатда ҳамёнбоп машиналар савдоси билан шуғулланувчи Chevrolet автосалонлари 2 тани ташкил этган бўлса, ҳозирда уларнинг сони 45 тага етган. Бир йил давомида россияликлар 2840 дона Chevrolet автомобилларини харид қилган.

2020 йилда Россияда коронавирус пандемияси сабаб Chevrolet’нинг фақатгина иккита автосалони фаолият юритган бўлиб, у ерда Spark, Nexia ва Cobalt сотилган. 2021 йилнинг ёзига келиб мамлакатдаги еттита федерал округнинг 37 та шаҳридаги салонлар иш бошлаган.

Nexia ва Cobalt автомобиллари Россияга Асакада ишлаб чиқарилган йирик узелли эҳтиёт қисмлардан фойдаланувчи Қозоғистоннинг «СариаркаАвтоПром» заводи томонидан етказиб берилмоқда. Ўз навбатида Spark UzAuto Motors корхонасининг ўзидан етказилади. Россияликлар орасида энг талабгир моделлар қаторига Chevrolet Cobalt етакчилик қилмоқда — бир йилда ушбу моделдан 1788 нусха сотилган бўлиб, бу жами сотилган автомобилларнинг 63 фоизини ташкил этади. Nexia эса савдоларнинг 29 фоизини (837 та) эгаллаган бўлса, А-классга кирувчи Spark хетчбекидан 215 нусха сотилган.

Маълумот учун, Chevroletнинг ҳамёнбоп моделлари Россияда 2018 йилга қадар Ravon бренди остида сотилган, бироқ 2018 йилнинг баҳоридан 2019 йилнинг кузига қадар Ravon’ларни етаказиб бериш амалга оширилмаган.

UzAuto Motors — Chevrolet’нинг Россиядаги иккита дистрибюторидан бири ҳисобланиб, ҳамёнбоп машиналарни етказиб бериш унинг назорати остида. Иккинчи дистрибютор — бу «Женерал Motors Россия» бўлиб, у Traverse ва Tahoe каби Америка моделларини етказиб бериш билан шуғулланади.

Аввалроқ Тожикистонда UzAuto Motors автомобилларини йиғиш йўлга қўйилиши, Ўзбекистонда сотувдан олинган Equinox моделини Қозоғистонда сотиш бошлангани тўғрисида хабар берилганди.