Америкалик экстремал Кен Блок бошқарган 900 от кучили Ford пикапи рекорд қийматда сотувга қўйилди (фото)

Американинг LBI Limited фирмаси 1977 йилги Ford F-150 базасида яратилган ноёб Hoonitruck пикапини сотувга қўйди. «Жимхана» сериали учун махсус яратилган автомобиль 1,1 миллион долларга баҳоланмоқда. Битим амалга ошса, пикап ўз модели тарихидаги энг қиммат нусхага айланади, деб хабар беради Motor.

Модификацияга учраган Hoonitruck америкалик экстремал Кен Блок «Жимхана» дрифт-сериалини суратга олиш вақтида бошқарган энг машҳур машина ҳисобланади. Суперпикап 1977 йилги классик Ford F-150 базасида яратилган. Бироқ ушбу машинага донордан фақат кузов панеллари мерос бўлиб қолган. Бундан ташқари, юк машинаси учун махсус индивидуал ғилдирак дискалари яратилган.

Hoonitruck капоти остидан 3,5 литрли V6 ўрин олган бўлиб, унинг устида Ford Performance муҳандислари ва Roush ательеси тюнерлари иш олиб борган. Агрегат прототипи «Ле-Мандаги 24 соат» учун махсус яратилган. Моторнинг яна бир ўзига хослиги алюминийли газ чиқариш коллекторининг 3D-принтерда чоп этилганида.

Ишлаб чиқариш вақтида ушбу эҳтиёт қисм аддитив технология ёрдамида яратилган тарихдаги энг катта деталь бўлган. Модификация натижасида двигатель 927 от кучи ва 952 Нм айланувчи моментни тақдим эта олган. Ноёб агрегат олти поғонали «секвентал» ёрдамида бошқарилади.

Америка компанияси Hoonitruck билан бирга кўплаб эҳтиёт қисмларни, жумладан, двигателнинг захира блоки, ғилдираклар ва кузовнинг айрим қисмларини беради.

Аввалроқ Элвис Преслига тегишли бўлган 54 йиллик GMS пикапи аукционга қўйилгани, дунёдаги энг кучли пикаплардан бири конвейердан чиқишга улгурмай пачақлангани тўғрисида хабар берилганди.