Ўтган ҳафтада тақдим этилган Tesla Model S Plaid электрокари дунёдаги энг тезкор серияли автомобиль сифатида эътироф этилган бўлиб, у соатига 100 километр тезликка салкам икки сонияда эришиши айтилган. Фримонтда ўтказилган тақдимот давомида тўрт эшикли электрокарнинг «паспорт» характеристикасини исботловчи видео тасвирга олинди — унда Tesla соатига 60 мил (97 километр) тезликка 1,99 сонияда эришган, деб хабар беради Motor.
Видеоёзув Twitter’даги Everyday Astronaut аккаунтида пайдо бўлган. У ерда «ҳозиргина физика қонунларини бузган» автомобиль ичида тест вақтида ҳайдовчидан ташқари яна уч киши борлиги кўрсатилган. Tesla Model S Plaid чорак мил масофани босишга 9,23 сония сарфлайди, максимал тезлиги эса соатига 322 километрга етади.
Model S Plaid’ни етказиб бериш ишлари ўтган ҳафтада бошланган. Энг тезкор Tesla’га 1034 от кучини тақдим этишга қодир учта электромотор ўрнатилган. Бошқа ўзига хос жиҳатлари қаторидан олд қаршилик коэффициентининг ўта пастлиги (0,208), энг замонавий ўйинларни ўйнаш мумкин бўлган мултимедиа тизими, шунингдек, 22 динамикли акустик тизим ўрин олган.
https://twitter.com/Erdayastronaut/status/1403212447557713920
Model S Plaid бир марта қувватланиш орқали 628 километр йўл боса олади. Аккумуляторни 300 километр масофага етадиган қувват билан тўлдириш учун 15 дақиқа етарли.
Аввалроқ Tesla Model S Plaid’нинг ғайриоддий рули шаҳар шароитида бошқаришда жуда ноқулай бўлиб чиққани тўғрисида хабар берилганди.
Изоҳ (0)