Словения ҳукумати 16 июндан мамлакатда COVID-19 эпидемияси тугаганини расман эълон қилди. Бироқ аҳолини эмлаш ва баъзи чеклов чораларига амал қилиш давом этади. Бу ҳақда мамлакат соғлиқни сақлаш вазири Янез Поклукара маълум қилди.

Фото: EPA

Словения Соғлиқни сақлаш вазирлигининг маълумотларига кўра, икки миллион аҳоли истиқомат қиладиган ушбу мамлакатда сўнгги 24 соат ичида 112 кишида коронавирус қайд этилди, икки бемор вафот этди.

Словениянинг 769 248 нафар аҳолиси коронавирусга қарши ғарбда ишлаб чиқарилган турли вакциналарнинг биринчи дозасини олган, катта ёшли 551 906 нафар словениялик тўлиқ иммунизация қилинган. Касалхоналарда 122 нафар бемор даволанмоқда, улардан 40 нафари реанимация бўлимларида.

«Эртадан бошлаб Словенияда эпидемия расман тугайди, аммо коронавирусга қарши кураш ҳали давом этади. Вакцинация эпидемияни назоратга олишнинг асосий чораси бўлиб қолмоқда», — деб ёзади Словения соғлиқни сақлаш вазири 15 июнь куни Twitter’да.

Соғлиқни сақлаш вазирлиги амалдаги эпидемияга қарши чоралар 17 июнга қадар амалда бўлишини ва кейинчалик қайта кўриб чиқилиши мумкинлигини айтди. Ёпиқ жамоат жойларида ниқоб тақиш, дезинфекцияловчи воситалардан фойдаланиш ва белгиланган масофани сақлаш мажбурий бўлиб қолади.

Бундан ташқари, Словенияда «қизил ҳудуд» мамлакатларининг доимий янгиланиб турадиган рўйхати мавжуд бўлиб, ушбу мамлакатлардан келувчилар карантиндан ўтиши керак бўлади.