Мексиканинг Халиско штатида юк поезди рельсдан чиқиб кетиб, турар жойларга урилиши оқибатида камида бир киши ҳалок бўлди ва яна уч нафар одам жароҳатланди. Бу ҳақда фавқулодда вазиятлар бўйича маҳаллий бошқарма ахборотига таяниб «Korrespondent.net» хабар берди.
«Тала муниципалитетидаги Сан-Исидро-Масатепек ҳудудида жами 108 та вагондан иборат поезд рельсдан чиқиб кетиши оқибатида юзага келган ҳолат оқибатлари бартараф қилинмоқда. Иккита локомотив ва 12 та вагон тўртта аҳоли яшаш уйига ағдарилган, оқибатда бир киши ҳалок бўлган ва уч нафар одам турли даражадаги тан жароҳатлари олган», — дейилади бошқарма хабарида.
Ҳалокатнинг содир бўлиш сабаблари ҳақида маълумот берилмаган. Ваколатли органлар яқин вақт ичида ҳодиса сабабларини ўрганиш бўйича тергов ишларини бошлайди.
Аввал июнда Покистонда иккита поезд тўқнашуви оқибатида 30 киши ҳалок бўлгани, майда Мехикода метро кўприги қулаши оқибатида ҳалок бўлганлар сони 23 кишига етгани, апрель ойида Тайванда поезд рельсдан чиқиб кетгани ва оқибатда 36 киши ҳаётдан кўз юмгани ҳақида хабарлар берилган.
Изоҳ (0)