Туркия ва Озарбайжон президентлари Ражаб Эрдўғон ва Илҳом Алиев Тоғли Қорабоғнинг Шуша шаҳрида ўзаро иттифоқчилик муносабатлари тўғрисидаги декларацияни имзолади. Бу ҳақда «РБК» хабар берди.
Ҳужжатда келтирилган қоидалар қаторида Озарбайжоннинг Нахичеван вилоятини мамлакатнинг қолган қисми билан (Арманистоннинг Сюник вилояти орқали) боғлаши керак бўлган Зангезур йўлагининг очилиши ҳам бор.
Бундан ташқари, Эрдўғон Шушада Туркиянинг бош консуллигини очиш нияти борлигини маълум қилди.
Декларацияни имзолагандан сўнг, президент Алиев иттифоқчилик қоидалари Озарбайжон ва Туркия ўртасидаги қўшма мудофаа ва ўзаро ҳарбий ёрдам масалаларини акс эттиришини айтди. У ҳужжатнинг ўзини «иттифоқчиликнинг дунёдаги ноёб намунаси» деб таърифлади.
Шуша — Тоғли Қорабоғдаги энг йирик аҳоли пунктларидан бири. Унинг Озарбайжон армияси томонидан қайтариб олиниши 2020 йил кузидаги қуролли тўқнашувнинг муҳим воқеалардан бири бўлди.
2021 йил май ойида Алиев расмий равишда Шушани мамлакатнинг маданий пойтахти деб эълон қилганди. У имзолаган буйруқда «Шуша шаҳрининг тарихий кўринишини тиклаш, уни аввалги шон-шуҳратига қайтариш ва анъанавий мазмунли маданий ҳаётни янгилаш тўғрисида» қарор қабул қилингани таъкидланган. Шаҳарни дунё миқёсида «кўп асрлик бой Озарбайжон маданиятининг ёрқин марвариди» сифатида танитиш режалаштирилган.
Изоҳ (0)