15 июнь куни соати 18:20 ларда Жиззах шаҳри ҳудудидан ўтган автомобиль йўлида содир бўлган йўл-транспорт ҳодисаси оқибатида икки киши ҳалок бўлди. Бу ҳақда ИИВ ЙҲХББ ахборот хизмати хабар берди.
Маълум қилинишича, Жиззах шаҳри ҳудудидан ўтган 4Р-36 автомобиль йўлининг 40-километрида 26 ёшли Э.Қ. бошқарувидаги Nexia автомобили ҳамда 1974 йилда туғилган Д.Э. бошқарувида бўлган Shacman русумли юк машинаси иштирокида тўқнашув содир бўлган.
Авария оқибатида Nexia ҳайдовчиси Э.Қ. ва ушбу автомобилда бўлган Д.Н. исмли 34 ёшли йўловчи турли тан жароҳатлари билан воқеа жойида вафот этган. Шунингдек, ушбу автомобиль ичида бўлган 11 ва 27 ёшли йўловчилар тан жароҳатлари билан шифохонага ётқизилган.
Жиззах вилояти ИИБ ЙҲХБ бошлиғи полковник Ҳусан Холқўзиевнинг сўзларига кўра, йўл-транспорт ҳодисаси йўлнинг хавфли бурилиш қисмида, Nexia ҳайдовчиси бошқарувни йўқотиб, қарама-қарши йўналишга чиқиб кетиши оқибатида юзага келган.
Мазкур ЙТҲ юзасидан Жиззах шаҳар ИИО ФМБ ҳузуридаги Тергов бўлими томонидан дастлабки терговга қадар текширув ҳаракатлари олиб борилмоқда.
Аввалроқ Қорақалпоғистон Nexia зовурга тушиб кетиши оқибатида ҳайдовчи вафот этгани, Сурхондарёда бир йил давомида 15 маротаба қоида бузган ҳайдовчи 17 ёшли ўсмирнинг ҳаётига зомин бўлгани, Самарқандда Lacetti билан тўқнашган «Жигули» ҳайдовчиси вафот этгани тўғрисида хабар берилганди.
Изоҳ (0)