Тўлиқ ўлчамли пикаплар бугунги кунда ҳар қачонгидан ҳам йириклашган ва оғирлашган, бироқ бунинг оқибатида улар пиёдалар учун катта хавф туғдирмоқда, айниқса, бунга хавфсизлик тизими тўпламининг «ночорлиги» сабаб бўляпти, деб ёзади Motor.
Харидорлар йирик пикапларни ишончли ва хавфсизлиги учун харид қилмоқда, бироқ Consumer Reports нашрининг ёзишича, катта ўлчамлар, ҳайратланарли масса ва баланд капот пиёдалар учун жиддий хавф туғдиради. 2000 йилдан буён капот қирраси 11 фоизга, машина оғирлиги эса 24 фоизга ошган. Бундан ташқари, тўлиқ ўлчамли пикаплар седан ва кроссоверлардан анча йирик бўлгани учун, кузовнинг ён томонларида «кўринмас зоналар» мавжуд. Шу билан бирга, барча пикаплар ҳам автоматик тормозланиш, пиёдаларни таниш каби тизимларни нафақат стандарт жамланма, балки алоҳида опция сифатида ҳам таклиф этмайди.
Ҳозирги кунда фақатгина Ford, Honda, Nissan ва Toyota пикаплари базавий жамланмада ушбу технологияларни таклиф этмоқда, General Motors ва Stellantis эса 2022 йилга бориб камида фавқулодда тормозланиш тизимини қўшишга ваъда берган. Маълумотларга кўра, сўнгги ўн йилликда пиёдаларнинг ўлими билан боғлиқ йўл-транспорт ҳодисалари 46 фоизга ошган. Мазкур муаммони зудлик билан ечишнинг имкони йўқ, чунки истеъмолчилар йирик ва оғир автомобиллардан воз кечишга тайёр эмас. Экспертларнинг фикрича, шунга қарамай, тез орада замонавий хавфсизлик тизимларини жорий этиш орқали вазиятни яхшилаш мумкин.
Эслатиб ўтамиз, 2021 йилнинг февралида J.D. Power консалтинг агентлиги минилган машиналар эгалари ўртасида ҳар йилги сўровномасини ўтказиб, дунёдаги энг ишончли уч йиллик автомобиллар рейтингини тақдим этганди. Етакчилар қаторидан Lexus, Porsche ва Kia маркалари ўрин олган бўлса, Land Rover, Alfa Romeo ва Jaguar охирги поғоналарни банд этган.
Изоҳ (0)