Сурхондарё ҳокимлиги қарийб 700 млн сўмга иккита Skoda Kodiaq харид қилди. Бу бўйича ҳокимлик изоҳ берди

Сурхондарё вилояти ҳокимлиги иккита Skoda Kodiaq автомобилини харид қилди. Бу давлат харидлари портали маълумотларида келтирилган.

Иккила шартнома (1, 2) ҳам 7 июнь куни тузилган бўлиб, ҳар бир автомобилнинг нархи 347 миллион сўмни ташкил этади.

«Gazeta.uz»нинг маълум қилинишича, вилоят ҳокимлиги матбуот хизмати раҳбари Захриддин Тўраев хизмат автомобиллари ҳоким Тўра Боболовнинг янги ўринбосари ва маслаҳатчиси учун харид қилинганини айтган.

Унинг сўзларига кўра, автомобилларни харид қилиш жараёнида Вазирлар Маҳкамасининг давлат хизматчиларининг хизмат автомобиллари нархининг чекланган миқдори ва йиллик ҳаракатланиш лимитини назарда тутувчи 29 апрелдаги қарори талабларига риоя қилинган. Ҳокимлар ўринбосарлари учун автомобилнинг чекланган нархи 1500 БҲМни (367,5 миллион сўм) ташкил этади, Skoda Kodiaq Ambition эса ушбу чекловдан 20,6 миллион сўмга арзонроқ (347 миллион сўм).

Эслатиб ўтамиз, 1−2 июнь кунлари Шавкат Мирзиёев Сурхондарё вилоятига ташрифи чоғида ҳудуддаги инфратузилмани яхшилаш учун 1,9 триллион сўм ажратилишини маълум қилганди. Давлат раҳбари, шунингдек, Сурхондарё учун алоҳида солиқ имтиёзлари жорий қилинишини таъкидлаган.

Эслатиб ўтамиз, 2020 йил ноябрь ойи бошида Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer, шунингдек, пандемия даврида Учқўрғон, Поп, Қўшработ ва Нарпай туманлари ҳокимликлари ҳам Trailblazer сотиб олгани тўғрисида хабар берилганди. Денов тумани ҳокимлиги эса карантин кучайтирилган пайтда — 2020 йилнинг июлида 398 миллион сўмга Trailblazer LTZ-AT, Наманган вилояти ҳокимлиги ҳам июлда бюджет маблағлари ҳисобидан 1 миллиард 579 миллион сўмга Toyota LC200 автомобилини ҳамда сентябрь ойида қарийб 400 миллион сўмга Trailblazer LTZ-AT русумли автомобиль харид қилган.

Бундан ташқари, Мирзачўл тумани ҳокимлиги 370 миллион сўмга Trailblazer, Қашқадарё вилояти ҳокимлиги ҳоким ўринбосарига 349 миллион сўмга Equinox, ҳокимнинг хотин-қизлар масалалари бўйича маслаҳатчисига, ёрдамчиси ҳамда ички ишлар бошқармаси бошлиғига 621 миллион сўмга 3 та Tracker хизмат машиналари сотиб олган.

Коррупцияга қарши курашиш агентлиги директори Акмал Бурҳонов мансабдор шахслар пандемия шароитида давлат маблағларининг самарали сарфланиши нақадар муҳим эканлигини тўла англаб етмаётгани, қиммат нархлардаги хизмат автотранспортлари харид қилинаётганига ҳам муносабат билдирган.

29 апрель куни Ўзбекистонда вазирлар 490 миллион, ҳокимлар 245 миллион сўмгача бўлган хизмат машиналарини миниши белгиланди.