Бухоро вилоят ИИБ ЖҚББ Гиёҳвандлик воситалари билан қонунга хилоф равишда муомала қилишга қарши курашиш бошқармаси томонидан 2021 йилнинг 28 май куни тадбир ўтказилган. Бу ҳақда вилоят ИИБ ахборот хизмати раҳбари Шуҳрат Жалолов «Дарё»га маълум қилди.
Билдирилишича, 28 май куни вилоят ИИБга Ромитан туманида яшовчи фуқаронинг гиёҳванд модда истеъмол қилиши ва уйини бангихонага айлантириб юборгани тўғрисида маълумот келиб тушган. Унга кўра, Ромитан тумани Газли шаҳрида яшовчи 39 ёшли фуқаро А.Д.нинг яшаш хонадони бориб ўрганилган. Ҳақиқатан ҳам ушбу хонадонда истеъмол қилиш мақсадида соф оғирлиги 3,51 грамм бўлган оқ рангли целлофан пакетга ўралган марихуана гиёҳванд моддаси мавжудлиги аниқланган.Бундан ташқари, фуқаро икки дона оқ рангли елим идишларда икки туп каннабис ўсимлигини ҳам етиштириб, парваришлаб келаётгани маълум бўлган. А.Д. ўзининг жиноий шериклари билан ўз уйида бангихона ташкил қилиб, биргаликда гиёҳванд моддаларни истеъмол қилиб келган. Шунингдек, эндигина махсус тайёрланган бир дона 0,5 литр ҳажмдаги елим сув идиши ҳам холислар иштирокида тегишли тартибда ҳужжатлаштириб олинган.
А.Д. билан суриштирув ишлари олиб борилганда, унга марихуана гиёҳванд моддасини 2021 йилнинг 24 май куни Пешку тумани «Шавгон» маҳалласида яшовчи таниши 42 ёшли фуқаро Х.Ш. сотгани аниқланган. Тезкор тадбир давомида фуқаро Х.Ш.нинг ҳам яшаш уйи кўздан кечирилган. Ушбу жараёнда Х.Ш. ўз томорқа ерида беш туп каннабис ўсимлигини етиштираётгани, шунингдек, ҳовлисининг молхонасида бир дона кул ранг рангли қопга солинган, соф оғирлиги 323 грамни ташкил этувчи марихуана гиёҳванд моддасини сотиш мақсадини кўзлаб, сақлаб келаётгани маълум бўлган.
Ҳолат юзасидан фуқаролар А.Д. ва Х.Ш.га нисбатан Жиноят кодекснинг 270-моддаси 1-қисми (тақиқланган экинларни етиштириш), 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб, қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) ва 276-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) билан жиноят иши қўзғатилган. Ҳозирги кунда дастлабки тергов ҳаракатлари олиб борилмоқда.
Изоҳ (0)