Тошкентда 8 июнь куни бузилаётган реклама баннерларидан бири ҳаракатланаётган Spark устига қулагани ҳақида хабар берилган эди. ИИББ ЙҲХБ ҳолат ўрганилиб, белгиланган тартибда кўриб чиқилиши таъминланишини маълум қилди.
Маълум қилинишича, ҳолат 8 июнь куни соат 12:00 ларда Чилонзор тумани, Бунёдкор кўчасида юз берган. 32 ёшли ҳайдовчи О.И. Spark автомобилда ҳаракатланиб кетаётганида йўлнинг ўнг томонида олиб борилаётган демонтаж ишлари сабаб реклама баннери йўл томонга қулаб автомобилга зарар етказган. Ҳодисада тан жароҳати олганлар йўқ.
«Мазкур ҳодиса юзасидан тегишли ҳужжатлар расмийлаштирилиб, ҳозирда Тошкент шаҳар ИИББ ЙҲХБ масъул ходимлари томонидан қўшимча суриштирувлар олиб борилмоқда», — дейилади хабарда.
ЙҲХББнинг «Gazeta.uz»га маълум қилишича, текширув якунига кўра вазиятга ҳуқуқий баҳо берилади.
Эслатиб ўтамиз, ҳодиса акс этган видео ижтимоий тармоқларда тарқалди. Ҳайдовчи реклама конструкцияларини бузаётган кишилар Тошкент шаҳар ҳокимлигидан эканини, конструкциялар шаҳар ҳокими ўринбосарининг буйруғи асосида бузилаётганини билдирган.
Шундан сўнг ҳокимлик вакиллари йиқитилган конструкция туфайли автомобилга етказилган зарар икки ўртада 50/50 тарзида қопланишини айтган. «Биз ҳам буйруқни бажаряпмиз, пулини тўлаб беролмаймиз», деган масъуллар.
Ҳайдовчи бунга рози эмаслигини айтиб, йўл ҳаракати хавфсизлиги ходимини чақирган. Унинг айтишича, ЙҲХ ходими ҳам ҳокимлик вакилининг гапларини қувватлаб, бу «баҳсли вазият» эканини билдирган ва автомобилни жарима майдонига олиб бориб қўйган.
Изоҳ (0)