Покистон Афғонистондан ўз қўшинларини олиб кетаётган ва зарурат туғилганида ушбу мамлакатда зудлик билан терроризмга қарши операцияларни амалга оширмоқчи бўлган АҚШга ўз ҳарбий базаларини тақдим этишдан бош тортди. Бу ҳақда Anadolu агентлиги хабар берди.
«База излаш уларнинг истаги бўлиши мумкин. Лекин уларга бизнинг базаларимизни бериш ҳақида гап ҳам бўлиши мумкин эмас, биз ўз манфаатларимиз ҳақида ўйлашимиз керак», — деб таъкидлади Покистон ташқи ишлар вазири Шоҳ Маҳмуд Қурейши.
Қайд этилишича, Америка президентининг миллий хавфсизлик бўйича маслаҳатчиси Жейк Салливан берилган Вашингтоннинг Покистонда учувчисиз самолёт базасини ташкил этиш нияти ҳақидаги журналистлар томонидан саволга Қўшма Штатларнинг Покистон билан ҳарбий, разведка ва дипломатик каналлар орқали Афғонистоннинг ҳеч қачон АҚШга қарши террористик ҳужумлар тайёрланадиган майдонга айланмаслиги масаласини муҳокама қилганини айтиб жавоб берди.
АҚШ 2021 йил май ойидан Афғонистондан ўз қўшинларини олиб чиқа бошлади. Бу жараённинг 2021 йилнинг 11 сентябргача якунланиши кутилмоқда.
«Биз Афғонистондан қўшинларнинг олиб чиқилиши билан бир қаторда, мамлакатда тинчлик ўрнатилишини истаймиз. Дунё Покистонни муаммонинг бир қисми деб ҳисобламайди», — деди Қурейши.
Аввалроқ АҚШ Афғонистондан ўз қўшинларининг учдан бир қисмини олиб кетгани, қўшинларни олиб чиқиш жараёнида АҚШга қайтарилмайдиган ёки Афғонистон миллий мудофаа ва хавфсизлик кучларига топширилмайдиган ҳарбий техникаларнинг йўқ қилиниши ҳақида хабар берилганди.
Изоҳ (0)